Վաշինգտոնը՝ ի նշան բողոքի, լքել է ՄԱԿ-ի կառույցի նիստը (տեսանյութ)

ԱՄՆ-ի ներկայացուցիչը՝ ի նշան բողոքի, լքել է ՄԱԿ-ի Զինաթափման համաժողովի նիստը՝ այսպիսով բողոքելով ընդդեմ ՄԱԿ-ի այս կառույցի նախագահության փոխանցմանը Սիրիային: Նախքան հեռացումը, ԱՄՆ-ի ներկայացուցիչ, դեսպան Ռոբերտ Վուդը լրագրողներին հայտնել է, որ սա խայտառակ օր է Զինաթափման համաժողովի պատմության մեջ, որը նման է խեղկատակության:

«Մենք չենք կարող աչք փակել Սիրիայի նախագահության հարցի վրա, որն աջակցում է այն ամենին, ինչի դեմ է պայքարում այս կառույցը»,-հայտարարել է դեսպան Վուդը:

Դեսպանի խոսքերով՝ զավեշտալին ոչ միայն Սիրիայի կողմից կառույցի ղեկավարման ստանձնումն է, այլ նաև այն, որ այսպիսով Սիրիան դառնում է այնպիսի կառույցի նախագահ, որը պետք է քիմիական զենքի պայմանագիր բանակցի, այն դեպքում, երբ ապրիլի 7-ին քիմիական հարձակում էր գործել Դոումայում:

Նա ընդգծել է ԱՄՆ-ի կողմից Դամասկոսի հանցանքների մասին բարձրաձայնելու կարևորությունը և կոչ արել իր գործընկերներին ևս հեռանալ համաժողովից:

Հիշեցնենք, որ կազմակերպության նախագահությունն հերթափոխության կարգով փոխանցվում է հաջորդ անդամ երկրին ամեն 4 շաբաթը մեկ:

Ռուսաստանն աջակցել է Սիրիային՝ կոչ անելով բոլոր կողմերին զերծ մնալ կառույցը սուր և հատկապես տարածաշրջանային խնդիրների շուրջ քաղաքական հաշիվների մաքրման հարթակի վերածելուց: Դրա մասին է հայտարարել նիստին ներկա Ռուսաստանի ներկայացուցիչը:

Անդամ երկրներից Իսրայելը միացել է Վաշինգտոնին, իսկ Ֆրանսիան չի ուղարկել իր ներկայացուցչին համաժողովի նիստին: Իր հերթին Մեծ Բրիտանիան հայտարարել է, որ այլև չի մասնակցի հանդիպումներին:

Աղբյուրը՝ Ամերիկայի ձայն