ԱՄՆ-ն կսատարի անվտանգության համակարգի ամրապնդման Վրաստանի պարտավորությունները

Վրաստանը քաղաքակրթության համար ռազմավարական կարեւոր սահմանագիծ է զբաղեցնում: Այս մասին հայտարարել է ԱՄՆ պետքարտուղարի Եվրոպայի եւ Եվրասիայի հարցերով օգնական Ուես Միթչելը Թբիլիսիում ՆԱՏՕ-Վրաստան ժողովրդական դիվանագիտության համաժողովի բացմանը ելույթ ունենալիս, փոխանցում է «Նովոստի-Գրուզիան»:

ԱՄՆ պետքարտուղարի օգնականը Վրաստանի իշխանություններին կոչ է արել ամրապնդել արդարադատության եւ դատարանների անկախության համակարգը:

«Դուք ակտիվորեն առաջ եք ընթանում ինստիտուցիոնալ բարեփոխումների ճանապարհով: Սա անչափ ուժեղ եւ ծանր ճանապարհ է: Սա ամրապնդում է ժողովրդավարությունը, ներդրումները եւ Վրաստանի բնակիչներից յուրաքանչյուրի հոգում հավատը»,- շեշտել է նա:

«Այս տարածաշրջանում Վրաստանն ամրագրել է ժողովրդավարական երկրի իր անունը: Մենք Վրաստանի կառավարությանն ու խորհրդարանին կոչ ենք անում ամրապնդել արդարադատության եւ դատարանների անկախության համակարգը: Պարտադիր պետք է լինի ոչ միայն բարեփոխումների իրականացումը, այլեւ դրանց իրական մարմնավորումը գործով»,- նշել է Միթչելը:

Նրա խոսքով՝ երկրի տնտեսության զարգացման ուղղությամբ Վրաստանի կառավարության քայլերն արժանի են հավանության: Միթչելը միաժամանակ հայտարարել է, որ ԱՄՆ-ն կսատարի անվտանգության համակարգի ամրապնդման Վրաստանի պարտավորությունները:

«Մենք իսկապես հավանություն ենք տալիս տնտեսության զարգացման ուղղությամբ Վրաստանի կառավարության եւ վարչապետի քայլերին: Վրաստանի կառավարությունն աշխատում է ռազմական համակարգի ամրապնդման համար եւ սերտորեն համագործակցում է ԱՄՆ Զինված ուժերի հետ: Մենք աջակցում ենք ռազմական ուժեղ բազա եւ համակարգեր ստեղծելու Վրաստանի պարտավորությանը: Սա կարեւոր է ոչ միայն Վրաստանի պաշտպանական հնարավորությունների համար, այլ նաեւ գլոբալ անվտանգության:

Նա նշել է, որ 2018 թվականի օգոստոսին եւս մեկ տարեթիվ է նշվում՝ Վրաստան Ռուսաստանի ներխուժման 10-ամյակը:

Միթչելը շեշտել է, որ ԱՄՆ-ն միանշանակ դատապարտում է Ռուսաստանի կողմից վրացական հողերի օկուպացիան եւ հաստատուն կերպով աջակցում է Վրաստանի տարածքային ամբողջականությանն ու ինքնիշխանությանը:

«Ամերիկայի Միացյալ Նահանգները միանշանակ դատապարտում է Ռուսաստանի կողմից վրացական հողերի օկուպացիան: Ռուսաստանի կողմից օկուպացված Աբխազիայի եւ Հարավային Օսիայի տարածքները Վրաստանի տարածքներն են: Ամերիկայի Միացյալ Նահանգներն աջակցում է Վրաստանի անկախությանը, ինքնիշխանությանը եւ տարածքային ամբողջականությանը միջազգայնորեն ճանաչված սահմանններում»,- հայտարարել է Ուես Միթչելը:

news.am