Հաշտություն բնության հետ

Տեղի է ունեցել «Հաշտություն բնության հետ. բնապահպանական վեճեր՝ կանխարգելումից մինչև լուծում» խորագրով միջազգային միջոցառումը, որը նվիրված էր կենսաբազմազանության պահպանության և բնական ռեսուրսների կայուն կառավարման համատեքստում բնապահպանական վեճերի կանխարգելման, կառավարման և արդյունավետ լուծման մեխանիզմներին։

Միջոցառման բացման խոսքով հանդես են եկել արդարադատության նախարարի տեղակալ Տիգրան Դադունցը, շրջակա միջավայրի նախարարի տեղակալ Հայկ Առաքելյանը և Ասիական զարգացման բանկի հայաստանյան մշտական ներկայացուցչության տնօրեն Լյազիզա Սաբիրովան։

Միջոցառման ընթացքում ոլորտի առաջատար միջազգային և տեղական փորձագետներն ու մասնագետները ներկայացրել են բնապահպանական և բնական ռեսուրսներին առնչվող վեճերի կանխարգելման և լուծման գործնական գործիքները, միջազգային փորձն ու լավագույն մոտեցումները։ Առանձնահատուկ ուշադրություն է դարձվել հաշտարարության, միջազգային արբիտրաժի և վեճերի այլընտրանքային լուծման մեխանիզմների կիրառման հնարավորություններին։

Քննարկումների ընթացքում մասնակիցներն անդրադարձել են շահագրգիռ կողմերի միջև համագործակցության խթանմանը, տարբեր և երբեմն հակասող շահերի համադրմանը, ինչպես նաև պետությունների, ներդրողների և տեղական համայնքների մասնակցությամբ բնապահպանական վեճերի արդյունավետ լուծման առանձնահատկություններին։

Անդրադարձ է կատարվել նաև հաշտարարության գործնական մեթոդներին, բնապահպանական վեճերում գիտական և տեխնիկական փորձագիտական գիտելիքների դերին, ինչպես նաև ձեռք բերված համաձայնությունների երկարաժամկետ իրագործման և շրջակա միջավայրի պահպանության ապահովման հարցերին։

Միջոցառման նպատակն էր խթանել համագործակցային և կայուն լուծումների կիրառումը՝ նպաստելով կենսաբազմազանության պահպանությանը, բնական ռեսուրսների արդյունավետ կառավարմանը և կայուն զարգացմանը։

Միջոցառումը կազմակերպվել էր Արբիտրաժի և հաշտարարության հայաստանյան կենտրոնի, «Օրենսդրության զարգացման կենտրոն» հիմնադրամի և Ասիական զարգացման բանկի աջակցությամբ։