Ընտրություններին ընդառաջ «Ականատեսը» ներկայացրել է ընտրությունների դիտարկման ծրագրերը 

Այսօր՝ հունիսի 5-ին, Մեդիա կենտրոնում կայացած մամուլի ասուլիսի ընթացքում «Իրավունքների զարգացման և պաշտպանության» հիմնադրամի տնօրեն Գենյա Պետրոսյանը ներկայացրեց «Ականատես» դիտորդական առաքելության գործունեությունն ու առաջիկա ընտրությունների դիտորդական ծրագրերը։

Ինչպես նշեց տիկին Պետրոսյանը՝ «Ականատես» դիտորդական առաքելությունը համատեղ նախաձեռնություն է, որը ձևավորվել է երկու կազմակերպությունների համագործակցության արդյունքում։ Առաքելությունն իրականացնում է ընտրական գործընթացների համապարփակ դիտարկում՝ ոչ միայն քվեարկության օրը, այլև դրան նախորդող և հաջորդող փուլերում։ Դիտարկման գործընթացը մեկնարկել է ապրիլի 1-ից և շարունակվելու է մինչև հետընտրական գործընթացների ամբողջական ամփոփումը։

Պետրոսյանի ներկայացմամբ՝ առաքելության աշխատանքը հիմնված է բազմաղբյուր և համապարփակ մեթոդաբանության վրա, որը համադրում է գրասենյակային և դաշտային հետազոտությունները։ Դիտարկումներն իրականացվում են երկարաժամկետ դիտորդների կողմից՝ կուսակցությունների տարածքային գրասենյակների, պետական և տեղական ինքնակառավարման մարմինների ներկայացուցիչների, ինչպես նաև համայնքների բնակիչների հետ հանդիպումների և հարցազրույցների միջոցով։ Տեղեկատվության ճշգրտման նպատակով կիրառվում են նաև պաշտոնական հարցումներ, իրականացվում է բաց աղբյուրների և զանգվածային լրատվամիջոցների մշտադիտարկում։

Դիտորդական առաքելությունը գործարկել է նաև IDitord.org հարթակը, որի միջոցով քաղաքացիները կարող են ներկայացնել ընտրական գործընթացներին առնչվող ահազանգեր, այդ թվում՝ անանուն կերպով։ Ներկայացված մի շարք ահազանգերի հիման վրա առաքելությունն արդեն հաղորդումներ է ներկայացրել իրավապահ մարմիններին։

Նշվեց նաև, որ առաքելության իրավաբանները հիմնավորված դեպքերում իրավապահ մարմիններին հաղորդումներ են ներկայացնում ընտրական իրավունքին առնչվող իրավախախտումների վերաբերյալ, ինչպես նաև վարչական դատարան հայցեր են ներկայացնում համապատասխան սուբյեկտներին վարչական պատասխանատվության ենթարկելու պահանջով։

Գենյա Պետրոսյանը ներկայացրեց նաև դիտորդական առաքելության թվային կարողությունները։ Նրա խոսքով՝ առաքելությունն ունի 61 երկարաժամկետ դիտորդ, որոնք վերապատրաստվել են ընտրական օրենսդրության և դիտորդների վարքագծի կանոնների շրջանակներում։ Նրանք իրականացնում են դիտարկումներ 38 ընտրատարածքային ընտրական հանձնաժողովների սպասարկման տարածքներում։

Քվեարկության օրը «Ականատեսը» կունենա 520 դիտորդ, որոնք կաշխատեն 260 ընտրական տեղամասերում։ Դիտորդները տեղամասերում կլինեն առավոտյան ժամը 7:00-ից՝ ընտրական հանձնաժողովների նախապատրաստական նիստերից սկսած մինչև արդյունքների ամփոփումը՝ վերահսկելով ամբողջ ընտրական գործընթացը: Ընտրախախտումների կամ միջադեպերի դեպքում նրանք կապ կհաստատեն համակարգման կենտրոնի հետ և կներկայացնեն համապատասխան տեղեկատվություն։

Բացի այդ, գործելու են 100 դիտորդներից կազմված 50 շրջիկ խմբեր, որոնք քվեարկության օրը կայցելեն շուրջ 400-500 ընտրական տեղամաս։ Եվս 66 դիտորդներ կաշխատեն 38 ընտրատարածքային ընտրական հանձնաժողովներում՝ հետևելով ընտրական պարագաների ընդունման-հանձնման և քվեարկության արդյունքների աղյուսակավորման գործընթացներին։

Top-news.am