Samsung-ի բաժնետոմսերն անկում են գրանցում կորպորացիայի ղեկավարի կալանավորման ֆոնին

Հարավկորեական Samsung Electronics ընկերության բաժնետոմսերը անկում են գրանցում կորպորացիայի ղեկավար Լի Չժե Յոնի կալանավորման ֆոնին, հայտնում է «ՌԻԱ Նովոստի»-ն՝ վկայակոչելով աճուրդների տվյալները:

Բաժնետոմսերը Կորեական բորսաում 1,21 տոկոսի անկում են գրանցել՝ համեմատած նախորդ օրվա աճուրդների տվյալների հետ, գրում է կայքը:

Սեուլի դատարանի որոշմամբ՝ ուրբաթ առավոտյան կալանավորվել է հարավկորեական Samsung Group տեխնոլոգիական ընկերության ղեկավար Լի Չժե Յոնը, որը մեղադրվում է երկրի նախկին նախագահ Պակ Կըն Հեի շուրջ ծավալված կոռուպցիոն սկանդալի շրջանակում կաշառք տալու համար:

Հիշեցնենք, որ երկրի դատախազության տվյալներով՝ Samsung Group-ը մի քանի միլիարդ դոլար է փոխանցել նախկին նախագահի մոտ ընկերուհուն պատկանող բիզնես ընկերություններին և կազմակերպություններին: Տրված կաշառքի դիմաց երկրի իշխանությունները նպաստել են Samsung Group-ի գործի բարգավաճմանը:

Քննությունը պետք է ավարտվի մինչև փետրվարի 28-ը և կարող է երկարաձգվել միայն մեկ ամսով՝ Հարավային Կորեայի նախագահի պարտականությունները կատարող վարչապետ Հվան Գյո Անի համաձայնությամբ:

«Մենք կանենք ամեն ինչ, որպեսզի ճշմարտությունը բացահայտվի գալիք դատական նիստերի ժամանակ»,- ասված է կալանավորման որոշումից հետո արված Samsung ընկերության հայտարարությունում:

tert.am