«Փորձում են վախի մթնոլորտ ստեղծել, բայց ավելի ենք ուժեղանում»․ Իրանի դեսպան

Իրանի Քերման քաղաքում հունվարի 3-ին գրանցված ահաբեկչական պայթյունների հեղինակները վրեժխնդիր են լինում՝ վախենում են Ղասեմ Սոլեյմանիի համակիրներից, ուզում են իրենց քաղաքականությունը պարտադրել մեզ, վախի մթնոլորտ ստեղծել իրանցի ժողովրդի շրջանում։ Այս մասին լրագրողների հետ զրույցում հայտարարել է ՀՀ-ում Իրանի արտակարգ և լիազոր դեսպան Մեհդի Սոբհանին։

Դեսպանությունում այսօր սգո մատյան է բացվել, որում պաշտոնյաները, քաղաքական ու հասարակական տարբեր գործիչներ իրենց ցավակցական գրառումներն են թողնում տասնյակ կյանքեր խլած ահաբեկչության կապակցությամբ։ Նախօրեին ահաբեկչական այդ հարձակման պատասխանատվությունը ստանձնել է «Իսլամական պետություն» ահաբեկչական խմբավորումը։

«Երկար տարիներ է, որ նրանք ոճրագործ քայլեր են իրականացնում մեր դեմ։ Գեներալ Ղասեմ Սոլեյմանին մեծ դերակատարություն է ունեցել «Իսլամական պետության» դեմ պայքարի գործում, և նրանք հայտարարել են, որ ստանձնում են ահաբեկչության պատասխանատվությունը։ Նրանք նպատակ ունեն իրանցի ժողովրդի շրջանում վախի մթնոլորտ ստեղծել, բայց իրենց գործողություններով ավելի են ուժեղացնում Իրանն ու երկրի իշխանություններին»,- հայտարարել է Սոբհանին։

Հիշեցնենք, որ Իրանի Քերման քաղաքում ահաբեկչական երկու պայթյունները տեղի են ունեցել հունվարի 3-ին՝ 2020 թվականին Բաղդադում ԱՄՆ ավիահարվածի հետևանքով Իրանի Իսլամական հեղափոխության պահապանների կորպուսի «Ղոդս» ստորաբաժանման հրամանատար, գեներալ-լեյտենանտ Ղասեմ Սոլեյմանիի սպանության 4-րդ տարելիցի օրը՝ նրա հիշատակին նվիրված արարողության ժամանակ։ Ըստ պաշտոնական վերջին տվյալների՝ ահաբեկչության հետևանքով զոհվել է 89 մարդ։

Այս թեմայով Իրանը և եվրոպական եռյակի երկրներն ավարտել են միջուկային խնդրի շուրջ բանակցությունների հերթական փուլը Իրանի նախագահը Հայաստան կայցելի օգոստոսի 18-21-ը Մենք չենք ընդունի սահմանների որևէ փոփոխություն. Աբաս Արաղչի Մենք ունենք գործելու երեք տարբերակ Ադրբեջանի հետ հարաբերություններում. Իրանի նախագահի որդի Խամենեիի խորհրդական Լարիջանին նշանակվել է Իրանի ազգային անվտանգության խորհրդի նոր քարտուղար