Ինչի համար կարող են տուգանել ու բանտ նստեցնել Սինգապուրում

Սինգապուր քաղաք-պետությունը հայտնի է ոչ միայն իր զարգացվածությամբ ու առաջադիմությամբ, այլև տարատեսակ ինքնատիպ արգելքներով ու դրանց համար նախատեսված տուգանքներով: Դրա արդյունքում երկրում հանցավորության մակարդակը նախանձելիորեն ցածր է:

AdMe.Ru կայքը որոշել է անտեղյակների համար բացահայտել, թե ինչ տուգանքներ են սպառնում մարդկանց Սինգապուրում, ինչպես նաև՝ թե ինչ հանցանքների համար այնտեղ կարելի է ճաղերի հետևում հայտնվել:

Գիշերը չի կարելի փողոցում խմբերով շրջել

Ուղիղ ժամը 22:00-ին Սինգապուրուոմ սկսվում է գիշերը, և եթե ուզում եք այդ ժամից հետո դուրս գալ զբոսնելու, ուրեմն չպետք է խմբով հավաքվեք: Տեղի օրենքն արգելում է ժամը 22:00-ից հետո 2-ից ավելի հոգով հավաքվել դրսում: Օրենքը խախտողները հայտնվում են ոստիկանական բաժանմունքում:

Միասեռականների նկատմամբ խիստ վերաբերմունք

Այստեղ խստագույնս արգելված է հանրության աչքի առաջ ցուցադրել նույն սեռի ներկայացուցչի նկատմամբ համակրանքը: Իսկ համբույրի դեպքում կարելի է մինչև 2 տարի ժամկետով բանտում հայտնվել: Սակայն սա չի նշանակում, որ Սինգապուրում միասեռականներ չկան: Նրանք պարզապես հավաքվում են «հատուկ» վայրերում:

Վերելակներում չի կարելի միզել

Ցավոք, վերելակում բնական կարիքները հոգալու տգեղ պրակտիկան տարածված է ամբողջ աշխարհում: Բայց միայն Սինգապուրում է, որ վերելակները համալրված են մեզի հայտնաբերման դետեկտորներով: Եթե ինչ-որ մեկը համարձակվի միզել, ապա ազդանշանային համակարգը կմիանա, դռներն ավտոմատ կփակվեն, կգան ոստիկաններն ու կտուգանեն:

Մաքրությունն ամեն ինչից վեր է

Իշխանությունները վերելակներից առավել խիստ հետևում են փողոցների մաքրությանը: Քաղաքի գործարար հատվածում կամրջակներն ու փողոցները շաբաթական մեկ անգամ լվանում են շամպունով: Նույնպիսի մաքրություն է տիրում նաև ծայրամասերում: Եթե իրավապահները նկատեն մեկին, որը կհամարձակվի ինչ-որ բան նետել փողոցում կամ թքել, տեղում տուգանք կգրեն:

Թեյավճարներն արգելված են

Սինգապուրում վաղուց արդյունավետ պայքար է ընթանում կոռուպցիայի դեմ: Դրա արդյունքում երկրում իսպառ բացակայում է թեյավճար թողնելու պրակտիկան: Անկախ նրանից, թե հաճախորդն ինչքան տպավորված է սպասարկման մակարդակից, նա չի կարող թեյավճար թողնել:

Ասենք «ո՛չ» մաստակին

Սինգապուր մաստակ բերելու համար նախատեսված է մինչև 100.000 սինգապուրյան դոլարի չափով տուգանք: Թեև քաղաքի ներսում մաստակ ծամելը թույլատրված է, բայց այն հնարավոր չէ գնել ոչ մի տեղ: Հայտնի է, որ Սինգապուրի իշխանությունները 1992թ. «պատերազմ են հայտարարել» մաստակին: Պատճառն այն է, որ տաք կլիմայով քաղաքում գետնին գցված մաստակը հալվում էր, կպչում ասֆալտին՝ փչացնելով անցորդների կոշիկներն ու ճանապարհը:

Խոսքի անազատություն

Սինգապուրի կառավարությունը չափազանց զգայուն է իր հասցեին հնչած քննադատության նկատմամբ: Նշվում է, որ իշխանություններին ընդդիմախոսելու դեպքում օտարերկրացուն կարգելեն հաջորդ անգամ երկիր մուտք գործել, իսկ Սինգապուրի քաղաքացուն կարող են կալանավորել: