Բենզինի գները հետեւողականորեն բարձրանում են

«Ժամանակ» թերթը գրում է. «Բենզինի գները հետեւողականորեն բարձրանում են, եւ դա շարունակվում է արդեն մեկ ամիս։ Ընդամենը մեկ ամիս առաջ 380 դրամ արժեցող ռեգուլյար տեսակի բենզինն այժմ արժե 420 դրամ։

Բենզինի թանկացման համար ոչ մի օբյեկտիվ պատճառ չկա․ նկատի ունենք, որ միջազգային շուկայում այդ մեկ ամսվա ընթացքում նավթի գների կտրուկ աճ չի եղել, նավթը տատանվել է 55 դոլարի սահմաններում։ Փոփոխության չի ենթարկվել նաեւ դրամի փոխարժեքը ռուսական ռուբլու եւ նույնիսկ դոլարի նկատմամբ։ ԵՏՄ մտնելուց հետո բենզինը ներմուծվում է Ռուսաստանից, եւ պետք է ենթադրել, որ դրա դիմաց վճարումները կատարվում են ռուբլով կամ առնվազն դոլարով։

Հայաստանում վաճառվող բենզինը կարող էր թանկանալ, եթե այն թանկանար նաեւ Ռուսաստանում։ Բայց, պարզվում է, Ռուսաստանում էլ գների մեծ փոփոխություն տեղի չի ունեցել։ Մեկ ամիս առաջ Ռուսաստանում А92 բենզինի մանրածախ միջին գինը եղել է 37 ռուբլի 29 կոպեկ, երեկ ռուսաստանյան միջին գինը 37,27 էր, այսինքն՝ 2 կոպեկով ավելի էժան։ Հայկական դրամով Ռուսաստանում բենզինի մանրածախ գինը 305 դրամ է։ Պարզ է, որ բենզինի թանկացումը միայն ներհայաստանյան պատճառներ ունի, բենզինը թանկանում է, որովհետեւ այդպես են ցանկանում բենզին ներմուծողը եւ վաճառողները։ Եթե վաղը նրանք որոշեն, որ բենզինը պետք է վաճառվի 500 դրամով, ապա հենց այդպես էլ կլինի։

Մանրամասները՝ թերթի այսօրվա համարում