Հայ հրշեջների տարօրինակ արկածները

ԱԻ նախարարությունը տեղեկություն է տարածել, թե երեկ ժամը 16:30-ի սահմաններում սուր աղիքային վարակի ախտանիշով Սյունիքի մարզի Գորիս քաղաքի ԲԿ-ի մանկական բաժանմունք է տեղափոխվել զբոսաշրջության նպատակով ԼՂՀ մեկնած 12 երեխա:

Հիմա ամենակարեւորը: ԱԻՆ-ից «Արմենպրես»-ին տեղեկացրել են, որ մանրամասները ճշտելու նպատակով Գորիսի ԲԿ է մեկնել հրշեջ-փրկարարական ջոկատի օպերատիվ խումբը:

Պատկերացնո՞ւմ եք: Ինչ որ մեկը խիստ հայացքով նայում է հրշեջ-փկարարների խմբին եւ հանձնարարում, թե գնացեք հիվանդանոց եւ մանրամասներ ճշտեք: Դուրս են գրում այսքան լիտր վառելիք եւ մի խումբ հրշեջների ուղարկում Գորիսի ԲԿ:

Հրշեջներն էլ իրենց մեքենայով սուրում են այնտեղ, հպարտ քայլվածքով մտնում հիվանդանոցի գլխավոր բժկի մոտ, թե բա պատմեք, պատմեք տեսնեմ ինչ կա չկա, երեխաները ոնց են, մեզ մանրամասներն են պետք:

Գլխավոր բժիշկն էլ մանրամասնորեն նկարագրում է հիվանդության ընթացքը, եւ թե ինչ բուժում են իրականացնում: Հրշեջներն էլ դուրս են գալիս եւ հիվանդ երեխաներին շաքարաքլորներ բաժանում եւ ուրախ-ուրախ վերադառնում կենտրոն եւ իրենց ղեկավարին փոխանցում մանրամասները:

Ահա այսպես է անցնում հայ հրշեջների ծանր աշխատանքային օրը:

Բայց վերջում մի հարց մնաց: Ինչու հրշեջներին ուղարկեցին մանրամասներ ճշտելու, եւ ինչու հեռախոսի օգնությամբ չկարողացան ճշտել մանրամասները:

Top-News.am