Հյուսիսատլանտյան դաշինքը Ռուսաստանի հետ երկխոսությունը կշարունակի. Ստոլտենբերգ

Հյուսիսատլանտյան դաշինքը Ռուսաստանի հետ երկխոսությունը կշարունակի, սակայն դաշնակիցների պաշտպանության իր պարտավորությունների ամբողջական պահպանմամբ: Այս մասին օգոստոսի 24-ին Ռիմինիում ելույթ ունենալիս հայտարարել է ՆԱՏՕ-ի գլխավոր քարտուղար Յենս Ստոլտենբերգը:

«Մենք կշարունակենք Ռուսաստանի հետ երկխոսություն հաստատելու ջանքերը, սակայն ոչ մեկը չպետք է կասկածի իր դաշնակիցներին պաշտպանելու ՆԱՏՕ-ի պատրաստակամությանը եւ վճռականությանը: Մեր ամբողջ պաշտպանությունը բացառապես պաշտպանական բնույթ ունի, առանձնանում է համաչափ մոտեցմամբ եւ թափանցիկությամբ»,- ասել է նա:

Ըստ Ստոլտենբերգի՝ Ռուսաստանը ՆԱՏՕ-ի ամենամեծ եւ կարեւոր հարեւանն է: «Եվ դաշինքը բախում չի փնտրում: Սառը պատերազմի ավարտից հետո մենք աշխատել ենք հարաբերությունների ամրապնդման վրա, սակայն Ռուսաստանի ագրեսիվ պահվածքը խախտում է եվրոպական անվտանգությունը»,- պնդել է Ստոլտենբերգը, փոխանցում է ՏԱՍՍ-ը:

Նա նշել է, որ ինքը մշտապես հավատացել է ՌԴ հետ կառուցողական երկխոսությանը հանուն խաղաղ գոյակցության՝ «միջազգային հանրության նորմերի եւ կանոնների համաձայն»: «Առանցքային է համարվում թափանցիկությունը եւ կանխատեսելիությունը՝ հատկապես, երբ լարվածությունն աճում է: Մենք պետք է հնարավոր ամեն ինչ անենք, որպեսզի սխալներ թույլ չտանք եւ մտնենք իրադարձությունների զարգացման գալարի մեջ, որոնք վերահսկողությունից դուրս են գալիս»,- հավելել է ՆԱՏՕ-ի գլխավոր քարտուղարը:

Լուրեր Հայաստանից - NEWS.am