Մոսկովյան այցին ընդառաջ ադրբեջանական կողմից փորձ է արվում ավելի թանկ վաճառել ռազմագերիների փոխանակման հարցը հայկական կողմի վրա

Ադրբեջանում ՄԱԿ-ի մշտական ներկայացուցիչը դիմել է քարտուղարին և ներկայացրել մի փաստաթուղթ, որտեղ մեր 62 ռազմագերիները ներկայացված են որպես ահաբեկիչներ: Այս մասին այսօր լրագրողների հետ զրույցում նշեց «Լուսավոր Հայաստան» խմբակցության անդամ Անի Սամսոնյանը:

«Ըստ երևույթին մոսկովյան այցին ընդառաջ փորձ է արվում ավելի թանկ վաճառել ռազմագերիների փոխանակման հարցը հայկական կողմի վրա: Այս մասին պետք էր շուտ մտածել, որ պատերազմից հետո մենք բացառեինք նոր ռազմագերիներ ունենալու փաստը, որքան գիտեմ Մարդու իրավունքների պաշտպանի գրասենյակը ներկայացրել է փաստաթուղթ, որտեղ մանրամասն ներկայացվում է, թե ինչպես են այդ ռազմագերիները հայտնվել Ադրբեջանում»,- նշեց Սամսոնյանը:

Նրա խոսքով՝ Ադրբեջանի կողմից մարդասիրական իրավունքի խախտում է ռազմագերիներին ներկայացնել որպես դիվերսանտ և դեմ է հետպատերազմյան շրջանում ռազմագերիների հայրենադարձման բոլոր կանոններին. «Այդ գերիները գտնվել են այն տարածքներում, որոնք պատերազմի հետևանքով անցել են Ադրբեջանի տիրապետության տակ և հետևաբար նրանք իրավունք ունեն համարվելու ռազմագերի և օգտվելու միջազգային կոնվենցիայով սահմանված պաշտապանության բոլոր միջոցներից»,- նշեց նա:

Հարցին, թե ի՞նչ ակնկալիք ունի Նիկոլ Փաշինյանի մոսկովյան այցից, պատգամավորը նշեց, թե բոլորը կենտրոնացած են այն բանի վրա, թե ինչ է քննարկվելու, բայց պետք է անհանգստանանք այն մասին, թե ինչպես է անցնելու քննարկումը. «Ըստ երևույթին քննարկվելու է երկու հարց՝ ռազմագերիների հարցը, որն ամենակարևորն է, դա պետք է լինի քննարկման առաջնահերթությունը, և հայտարարության 9-րդ կետը՝ ճանապարհների, տրանսպորտային ենթակառուցվածքների ապաշրջափակումը: Խորը մտահոգություններ է առաջացնում, որ այն բանակցողը, որը ծաղրի, սարկազմի, հեգնանքի է ենթարկվել Ադրբեջանի նախագահի կողմից, նստելու է բանակցության կողքին, որը կարող է խորը բարոյահոգեբանական խոչընդոտներ ստեղծել՝ բանակցություններում հայանպաստ լուծումներ ձևակերպելու շուրջ»:

Անդրադառնալով մոսկովյան այցի ժամանակ քննարկվող՝ Սյունիքի միջոցով իրականացվող տրանսպորտային կոմունիկացիաների վերաբերյալ վարչապետի խոսնակի մեկնաբանությանը՝ նա նշեց, որ կարևոր է հասկանալ՝ ինչպե՞ս են անցնելու այն ուղիները, ովքե՞ր են կառուցելու այդ ճանապարհային կոմունիկացիները և ո՞ւմ վերահսկողությամբ են իրականացվելու:

«Հայտարարության 9 կետում ներկայացված է, որ Հայաստանի Հանրապետությունը երաշխավորում է Ադրբեջանի և Նախիջանի միջև տրանսպորտային կապը, այդ կետում գրված է միայն ՀՀ անվտանգության երաշխավորության մասին, գրված չէ՝ արդյո՞ք Ադրբեջանը երաշխավորելու է հայկական կողմի բիզնեսի և ֆիզիկական շարժի անվտանգությունը: Ադրբեջանում հայատյացությունը բարձր մակարդակի վրա է, քաղաքական վերնախավը ևս նման վերաբերմունք է դրսևորում, պե՞տք է տրվեն երաշխիքներ, թե ոչ»,- նշեց նա: