Ալի Ռաբեի. Իրանը, Թուրքիան եւ Ռուսաստանը կարող են օգնել Երեւանին ու Բաքվին հասնել խաղաղության
«Ադրբեջանի եւ Հայաստանի հակամարտությունը խաղաղ լուծում ունի, եւ Իրանը, Թուրքիան ու Ռուսաստանը կարող են օգնել երկու կողմերին էլ հասնել խաղաղության»: Այս մասին հայտարարել է ԻԻՀ կառավարության ներկայացուցիչ Ալի Ռաբեին, հաղորդում է Mehr-ը:
Նրա խոսքերով, Հայաստանն ու Ադրբեջանը կարող են վեճը լուծել «ընդհանուր մշակութային գործոնների հիման վրա»: Նա հայտնել է Իրանի պատրաստակամությունը` օգնելու երկու կողմերին էլ պահպանել խաղաղությունը:
«Մենք նաեւ կարծում ենք, որ երկու հարեւան երկրների միջեւ տարաձայնությունները խաղաղ լուծում ունեն, եւ Իրանը, Թուրքիան ու Ռուսաստանը կարող են օգնել երկու հարեւաններին իրականացնել ՄԱԿ-ի բանաձեւերը՝ իրենց տարաձայնությունները խաղաղ ճանապարհով լուծելու համար»: «Մենք բազմիցս հայտարարել ենք, որ հարգում ենք Ադրբեջանի եւ Հայաստանի տարածքային ամբողջականությունը, ինչպես նաեւ երկու երկրների ինքնիշխանությունը»,- հավելել է նա: «Հայաստանն ու Ադրբեջանը մեր երկու բարեկամներն ու եղբայրներն են, եւ Իրանի համար կարեւոր է երկու երկրների տարածքային ամբողջականությունը»։