Հայաստանն ու Ադրբեջանը պետք է մարտավարական որոշում կայացնեն միմյանց հետ գոյակցելու հարցում և հետևեն այն ծրագրին, որը տանում է խաղաղության. Թոմաս դե Վաալ
Քարնեգի հիմնադրամի ավագ գիտաշխատող, կովկասագետ Թոմաս դե Վաալը մի քանի վերլուծական դրույթներ է ներկայացրել՝ անդրադառնալով Արցախում տիրող ռազմական բախումներին՝ շեշտելով, որ կողմերից ոչ մեկն արդարադատության մենաշնորհ չունի:
«Երկու կողմերն էլ պատմական հավակնություններ ունեն Ղարաբաղի նկատմամբ: Այն միջնադարյան Հայկական թագավորության բնակավայր է եղել 12-րդ դարում և ադրբեջանական խանություն 18-րդ դարում: Երկու ժողովուրդներն էլ բնակվել են կողք-կողքի, հիմնականում՝ խաղաղ»,- գրել է մասնագետը:
Վերջինս նշել է, որ շատ է քարոզչությունը և հորդորել է հավատալ միայն երկու կողմից ստացվող պաշտոնական տեղեկությանը:
«Ադրբեջանը, որը 1990-ականներին տեղի ունեցած հակամարտության պարտվող կողմն է, հակված է ռազմական ագրեսիա կիրառելու տեղում իրավիճակը փոփոխելու համար: Դա հենց այն է, ինչ նրանք արեցին կիրակի: Եվ այո, նրանք, հավանաբար, ընտրել են այն պահը, երբ իրենց կարծիքով աշխարհի ուշադրությունը շեղվել է»,- նկատում է բրիտանացին:
«Լեռնային տարածաշրջանում, որտեղ ծանր սպառազինում է տեղակայված ,շփման գծում՝ գյուղերի և քաղաքների հարևանությամբ, դժվար է որևէ կողմի համար «հաղթել»՝ ցանկացած ռազմական իրավճակում: Ավելի շատ մարտերն ուղղակի ավելի շատ արյունահեղության, տառապանք և ատելության կհանգեցնեն: Վերջիվերջո, Հայաստանն ու Ադրբեջանը պետք է մարտավարական որոշում կայացնեն միմյանց հետ գոյակցելու հարցում և հետևեն այն ծրագրին, որը զիջումներ է ենթադրում և տանում է խաղաղության: Դա մի օր տեղի կունենա»,- գրել է կովկասագետը:
«Միջազգային հանրությունը կարող է օգնել խաղաղության գործարքի կնքմանը, ֆինանսական աջակցություն ցուցաբերել, սակայն հայերն ու ադրբեջանցիները միայն կարող են լուծել այս խնդիրը»,- եզրափակել է դե Վաալը: