Այսօր Կապույտ երկնքի համար մաքուր օդի միջազգային օրն է
2020 թվականի սեպտեմբերի 7-ին առաջին անգամ նշվում է Կապույտ երկնքի համար մաքուր օդի միջազգային օրը (International Day of Clean Air for blue skies), գրում է Calend.ru-ն։ Սեպտեմբերի 7-ը, որը հաստատվել է ՄԱԿ-ի Գլխավոր Վեհաժողովի կողմից 2019 թվականի դեկտեմբերի 19-ին, կոչված է սեւեռել բոլոր երկրների ուշադրությունն օդի աղտոտվածության խնդրին։ Գիտնական բժիշկները պնդում են, որ ինսուլտի, քրոնիկական շնչառական հիվանդությունների, թոքերի քաղցկեղի եւ անգամ սրտանոթային հիվանդությունների հետեւանքով մահացության մի մասը պայմանավորված է աղտոտված մթնոլորտով։
Մարդու գործունեության հետեւանքով մթնոլորտում կարծր մասնիկների, գազերի արտանետումները ոչ միայն համաշխարհային մակարդակով բացասական ազդեցություն են թողնում կլիմայական ոլորտում, այլ նաեւ ուղղակիորեն ազդում են մարդու առողջության վրա։
ՄԱԿ-ի հիմնական կոչն ուղղված է առ այն, որ հնարավոր դառնա գրավել աշխարհի բոլոր պետությունների ուշադրությունն այդ խնդրի նկատմամբ, հոգ տանել ձեռնարկությունների եւ տրանսպորտի՝ մթնոլորտում վնասակար արտանետումների կրճատման մասին մեր մոլորակում օդի եւ հենց մարդկության առողջացման նպատակով։