Սանկտ Պետերբուրգում 2200 լուսարձակող անօդաչու տպավորիչ պատկերներ են ստեղծել երկնակամարում (լուսանկար, տեսանյութ)

Ռուսաստանի Սանկտ Պետերբուրգ քաղաքում Երկրորդ համաշխարհային պատերազմի ավարտի կապակցությամբ անօդաչու թռչող սարքերի օգտագործմամբ մասշտաբային միջոցառում է տեղի ունեցել, գրում է ՏԱՍՍ գործակալությունը։

Աղբյուրը մանրամասնում է, որ սպորտային հրապարակից միաժամանակ վեր է բարձրացել 2200 լուսարձակող սարք՝ գիշերային երկնակամարում «կենդանի» պատկերներ ստեղծելով:

«Այսօր համաշխարհային ռեկորդ է սահմանվել «երկնքում միաժամանակ գտնվող թռչող սարքերի ամենամեծ քանակությամբ» անվանակարգում»,- լրագրողներին հայտնել է Ռուսաստանում ռեկորդների գրքի հեղինակ Ստանիսլավ Կոնենկոն։

Թռչող սարքերով շոուի ղեկավար Սեմյոն Լոբկոյի խոսքով՝ համաշխարհային նմանատիպ նախորդ ռեկորդը սահմանվել էր 2018 թվականին․ այդ ժամանակ երկինք էր բարձրացել միաժամանակ ընդհանուր 2066 սարք։

Նշվում է, որ պետերբուրգյան «Գեոսկան» ընկերությունն իր սարքերը 50-ից մինչև 300 մետր բարձրության վրա է պահել։ Սարքերի միջոցով ստեղծված պատկերների շարքում են եղել կարմիր աստղը, խորհրդային զինվորը, աղավնին և «2020՝ հիշատակի ու փառքի տարի» գրությունը։
Շոուն կրել է «Խաղաղ երկինք» անունը։