Intel-ը փոխում է իր տարբերանշանը
Չորեքշաբթի օրը Intel-ը ներկայացրել է իր նոր տարբերանշանը: Ընկերության կայքում ասվում է, որ այն արտացոլում է Intel-ի ոճի պարզեցումը: Հաղորդագրության տեքստում ասվում է, որ նոր լոգոյումն «նուրբ համաչափությամբ, հավասարակշռությամբ եւ համամասնություններով» պահպանվում է հին տարբերակների ժառանգությունը, ինչը այն դարձնում է միաժամանակ եւ՛ ծանոթ, եւ՛ նոր, հաղորդում է ՏԱՍՍ-ը:
Տեքստում առանձին նշվում է, որ «i»-ի վերեւի կետը խորհրդանշում է ընկերության պրոցեսորների պոտենցիալն ու ուժը: 1968 թվականին հիմնադրված Intel-ը արտադրում է էլեկտրոնային սարքեր եւ համակարգչային բաղադրիչներ, այդ թվում՝ միկրոպրոցեսորներ: Ընկերության շրջանառությունը 2019 թվականին գերազանցել է 72 միլիարդ դոլարը: