Թրամփը Քենոշայի քաղաքապետ, դեմոկրատ Ջոն Անթառամյանին հիմար է անվանել

ԱՄՆ նախագահ Դոնալդ Թրամփը հիմար է անվանել Քենոշա քաղաքի ղեկավար, դեմոկրատ Ջոն Անթառամյանին՝ մեղադրելով նրան «արմատական անարխիստներին» պաշտպանելու մեջ, հայտնում է BBC-ն:

Ուղեւորվելով դեպի Քենոշա՝ Թրամփը հայտարարել է, որ Վիսկոնսին նահանգի այդ քաղաքը մոխիր կդառնար, եթե նա այնտեղ չուղարկեր Ազգային գվարդիայի ստորաբաժանումները:

«Մարդիկ տեսնում են, թե ինչ է կատարվել, եւ չեն կարող հավատալ, որ դա տեղի է ունենում մեր երկրում: Ես նույնպես չեմ կարող հավատալ դրան»,- նախագահական ինքնաթիռ բարձրանալիս ասել է Թրամփը։

Դոնալդ Թրամփը մեկնել է Քենոշա՝ չնայած դա չանելու կոչերին:

Քաղաքում օգոստոսի 23-27-ը զանգվածային անկարգություններ էին տիրում՝ սպիտակամորթ ոստիկաննների կողմից 29-ամյա աֆրոամերիկացի Ջեյքոբ Բլեյքին վիրավորելու պատճառով:

Քենոշայում նախագահը կհանդիպի տեղի ոստիկանների եւ ազգային գվարդիականների հետ, որոնք, նրա խոսքերով, լավ աշխատանք են կատարել, եւ կնայի անկարգությունների ընթացքում վնասված օբյեկտները:

Դեմոկրատ նահանգապետ Թոնի Էվերսը Թրամփին հորդորել էր չայցելել Քենոշա, քանի որ կարծում է, որ նրա այցը «չի նպաստի վերքերի բուժմանը»:

Վիսկոնսինը 14 «տատանվող նահանգներից» մեկն է, որտեղ իրականում որոշվում է նախագահական ընտրությունների ճակատագիրը: 2016-ին Թրամփն այնտեղ նվազագույն առավելությամբ է հաղթել: Ըստ հարցումների, այժմ Վիսկոնսինում ոչ մեծ առավելությամբ առաջատարը Բայդենն է։