Օվկիանոսը նետված շշով նամակը 35 տարի «ճանապարհորդելուց» հետո վերադարձել է այն ուղարկողի մոտ

ԱՄՆ-ում օվկիանոսը նետված շշով նամակը 35 տարի «ճանապարհորդելուց» հետո հայտնաբերվել է նետված վայրից ոչ հեռու, հայտնում է lenta.ru կայքը։

Աղբյուրը մանրամասնում է, որ 1985 թվականի օգոստոսի 1-ին ամերիկյան Դելավեր նահանգի բնակչուհիներ Քեթի Ռիդլը և Սթեյսի Ուելսը շշի մեջ պահված նամակը նետել են օվկիանոսը: Նրանք հույս են ունեցել, որ իրենց ուղերձն այլ մայրցամաք կհասնի։

2020 թվականի օգոստոսի սկզբին նույն նահանգի բնակիչ Բրեդ Վախսմութը Բրոդկիլ գետով կայակով շրջելիս է եղել և պատահմամբ նկատել է ջրի մակերևույթին լողացող շիշը։ Ափ հասնելով՝ տղամարդը կարդացել է նամակն ու որոշել գտնել դրա հեղինակներին։

Վախսմութը կապ է հաստատել Ռիդլի հետ, հանդիպել նրան ու վերադարձրել նամակը։ Կինն էլ, իր հերթին, ուրախ է եղել, որ իր նամակը հասցեատեր է ունեցել, սակայն նաև զարմացել է, թե ինչպես 35 տարվա մեջ շիշը չի լքել հարազատ նահանգը։