Ինտերնետային վիրավորանքների դեմ քաղաքավարի տառատեսակ է ստեղծվել
Ֆիննական ընկերությունը մշակել եւ հասանելի է դարձրել մի տառատեսակ, որը թաքցնում է անպարկեշտ արտահայտությունները, իսկ վիրավորական բառերը փոխարինում է չեզոքներով, գրում է «Հանրամատչելի մեխանիկա»-ն։
Ծաղրի, ռասիզմի, սեքսիզմի եւ անհանդուրժողականության այլ ձեւերի ուսումնասիրությամբ զբաղվող փորձագետների խումբը՝ tietoEVRY ընկերությունից, ստեղծել է աշխարհում «ամենաքաղաքավարի» տառատեսակը, որը կոչվում է The Polite Type։ Տառատեսակի մեջ ներմուծված ալգորիթմը մեղմում է ոչ նորմալ բառապաշարը եւ զայրացած վիրավորական արտահայտությունները փոխարինում է չեզոք բառերով: Խելացի տառատեսակի բառարանը պարունակում է մոտ 1800 բառ: Բաց կոդով տառատեսակը համատեղելի է տեքստային հայտնի խմբագիրների հետ:
Եթե ինտերնետային վիճաբանության ժամանակ օգտագործողը գրի «Ես ատում եմ քեզ», ապա նախադասությունն ինքնաբերաբար կփոխվի «Ես համաձայն չեմ քեզ հետ» տարբերակի: Տառատեսակը «Նա տգեղ է» արտահայտությունը կվերածի «Նա չի արտացոլում գեղեցկության ընդունված չափանիշները»: Նվաստացնող ռասայական տերմինները կփոխարինվեն ռասաների գրական անուններով: «Դու հիմար ես» վիրավորանքը ավելի մեղմ կդառնա «Դու միամիտ ես»: Կտրուկ հուզական վիրավորանքները, օրինակ՝ «ապուշ»-ը, կմեղմացվի:
ՄԱԿ-ի վերջին զեկույցը ցույց է տվել, որ փոքր երեխաների մեկ երրորդ մասը խոսում է համացանցում իրենց վիրավորանքներ հասցնելու մասին: Յուրաքանչյուր հինգերորդը խոստովանել է, որ համացանցում վիրավորանքների պատճառով բաց է թողել դասերը: Ըստ tietoEVRY-ի տվյալների՝ վիրտուալ սպառնալիքների զոհերի ավելի քան 35%-ը անընդհատ տագնապ է ապրում: Նրանց 20%-ը տառապում է անքնությունից:
Polite Type-ի թիմը գիտակցում է, որ իր ստեղծած գործիքը կարող է խոսքի ազատության դեմ ոտնձգություն համարվել: Մասնագետները, այնուամենայնիվ, հորդորում են որեւէ մեկի կարծիքի հետ չհամաձայնելու իրավունքը չշփոթել բացահայտ ատելության հետ, եւ հուսով են, որ իրենց աշխատանքը խուլիգաններին ցույց կտա ինչպես ճիշտ ձեւակերպել իրենց դիրքորոշումը քաղաքավարի հասարակության մեջ: