Բեյրութում պայթած ամիակային սելիտրայով լի բեռը Վրաստանից ուղեւորվում էր Մոզամբիկ
Մոզամբիկը հերքել է Բեյրութի պայթյունի համար իր պատասխանատվությունը, հաղորդում է AFP-ը՝ հղում անելով Մոզամբիկի կառավարության ներկայացուցչին: Ավելի վաղ հաղորդվել է, որ Բեյրութի նավահանգստում պայթած ամիակային սելիտրան տեղափոխվում էր Մոզամբիկ:
Կառավարության ներկայացուցչի խոսքով՝ Մոզամբիկը հերքում է իր պատասխանատվությունը, քանի որ խնդիրը ոչ թե ամիակային սելիտրան էր, այլ դրա պահման անհարմար պայմանները:
2750 տոննա սելիտրան պատվիրվել էր 2013 թվականին Վրաստանում, սակայն բեռն այդպես էլ չէր հասել պատվիրատուին՝ պարզաբանել են Մոզամբիկի Fabrica de Explosivos de Mocambique (FEM) ֆիրմայում, որը պայթուցիկ նյութեր է արտադրում լեռնային աշխատանքների համար, հաղորդում է DW-ը:
Ավելի վաղ հաղորդվել է, որ ամիակային սելիտրայով բեռն առգրավվել է 2014 թվականին Rhosus մոլդավական դրոշով նավից, որը Բաթումիից Մոզամբիկ էր ուղեւորվում: 2013 թվականին խնդիրների պատճառով բեռը չծրագրված կանգ է առել Բեյրութում, որտեղ առգրավվել է, իսկ ամիակային սելիտրան պահվել է նավահանգստի պահեստներից մեկում: Այդ ժամանակ նավի սեփականատերն էր Teto Shipping կիպրական ընկերությունը,իսկ փաստացի սեփականատերը Կիպրոսի բնակիչ, Խաբարովսկում ծնված ձեռնարկատեր Իգոր Գրեչուշկինն էր:
Հիշեցնենք, որ Բեյրութի նավահանգստում պայթյուն է տեղի ունեցել օգոստոսի 4-ին, հզորությունը հավասար է եղել 3,3 բալ ուժգնությամբ երկրաշարժի: Զոհվել է 160 մարդ, ավելի քան 6000-ը վիրավոր է: