Շոտլանդացին մետաղորսիչի օգնությամբ հողի տակից ավելի քան 3000 տարվա վաղեմության գանձեր է հայտնաբերել (լուսանկարներ)
Գանձերի որսորդ Մարիուս Ստեպյենը Շոտլանդիայի դաշտերից մեկում մետաղորսիչի օգնությամբ հայտնաբերել է տասնյակ հազվադեպ հանդիպող իրեր, որոնց մի մասը թվագրվում է Բրոնզե դարին:
Ինչպես նշում է The Guardian-ը, հայտնաբերված նմուշների շարքում առավել ուշագրավ են ձիու լծասարքը, պահպանված կաշին ու փայտը, ինչպես նաև մ.թ.ա. 1000-900թթ. թվագրվող սուրը:
Տղամարդը պատմել է, որ ընկերների հետ դաշտում գանձեր որոնելու ժամանակ այնպիսի հզոր ազդակ է ստացել հողից, որ անմիջապես զանգահարել է Treasure Trove կազմակերպությանը:
«Հայտնագործության պահն այնքան հուզիչ էր: Ես հենց ամենասկզբից զգում էի, որ սա կարող է ինչ-որ արտառոց բան լինել, և ես հայտնաբերեցի շոտլանդական պատմության մի մեծ մասը: Երջանկությանս չափ ու սահման չկար»,-նշել է տղամարդը:
Ընդհանուր առմամբ, Treasure Trove-ի հնագետները 22 օր պեղումներ են անցկացրել: Դրանց մասնակցել են նաև Ստեպյենն ու իր ընկերները՝ ցանկանալով մինչև վերջ ներկա լինել պեղումներին:
«Այնքան գոհ եմ, որ հողն ինձ համար բացահայտեց ավելի քան 3000 տարի թաքնված գանձերը»,-հավելել է շոտլանդացին: