Լեխ Կաչինսկիի ինքնաթիռում պայթուցիկ է դրվել Ռուսաստանում օդանավի վերանորոգման ժամանակ. Լեհաստան
Տրոտիլը, որի պայթյունը դարձել է Լեհաստանի նախագահ Լեխ Կաչինսկիի Տու-154 օդանավի կործանման պատճառ, ինքնաթիռում է դրվել Ռուսաստանում դրա վերանորոգման աշխատանքների ժամանակ:
Ինչպես նշում է eadaily.com կայքն, այս մասին հայտարարել է ավիաաղետի կրկնակի հետաքննման լեհական հանձնաժողովը:
Նշվում է, որ ավիաաղետի պատճառ է դարձել տրոտիլի պայթյունը: Մինչդեռ պայթուցիկ նյութերի հետքերի հայտնաբերումը հաստատել են լեհական և բրիտանական լաբորատորիաները: Նշվում է, որ հետքերը հայտնաբերվել են ինքնաթիռի այն հատվածներում, որոնք ռուս տեխնիկները փոխել են նախագահի օդանավի վերանորոգման աշխատանքների ժամանակ:
Հիշեցնենք, որ լեհ քննիչները երկրորդ անգամ են արտաշիրիմել 2010թ.-ին Ռուսաստանում նախագահական ինքնաթիռի վթարի զոհերից երեքի մարմինները, քանի որ վթարից հետո ռուս հետաքննիչների արած ուսումնասիրության և լեհական կողմի ունեցած տվյալների մեջ զգալի անհամապատասխանություններ են եղել:
Մասնավորապես՝ պատգամավոր Զբիգնև Վասերմանի մոտ տարիներ առաջ արված վիրահատության պատճառով բացակայել են մի շարք օրգաններ, իսկ ռուսական արձանագրություններում դրանք առկա են: Մեկ այլ քաղաքական գործիչ Պժեմիսլավ Գոսերսկու հերձման արդյունքում պարզվել է, որ ռուսական կողմը նրա հասակը 20սմ-ով ավելի երկար է գրել:
Իսկ Լեհաստանի պատմության պետական ինստիտուտի ղեկավար Յանուշ Կուրտիկայի մարմնի արտաշիրիմումը ցույց է տվել, որ Ռուսաստանում նրան ընդհանրապես չեն հերձել, քանի որ բացակայում են համապատասխան սպիները:
Լեհական բարձրաստիճան պատվիրակությանը Ռուսաստան հասցնող ինքնաթիռը կործանվել էր 2010թ. ապրիլի 10-ին՝ Սմոլենսկի օդանավակայանի մոտակայքում: