Վորոնեժում ադրբեջանցիների սադրանքի հետեւանքով 14 մարդ է ձերբակալվել
Երեկ Վորոնեժում ադրբեջանցիները ավտոմեքենաներով երթեւեկում ու բղավում էին՝ «Մահ հայերին», որից հետո բախումներ սկսվեցին: Բարեբախտաբար, տուժածներ չկան, քանի որ իրավապահ մարմինների աշխատակիցները ժամանակին հասան եւ կարողացան բաժանել բախման մասնակիցներին: Այս մասին NEWS.am-ի հետ զրույցում ասաց Ռուսաստանի հայերի միության փոխնախագահ Գերման Անանյանցը:
Նա պարզաբանեց, որ արդյունքում 14 մարդ ձերբակալվել է: «Այս ֆոնին ստեղծվել է համակարգող խորհուրդ հայ եւ ադրբեջանցի սփոյուռքների ներկայացուցիչների մասնակցությամբ՝ լարվածության հետագա աճ թույլ չտալու համար»,- նշեց Անանյանցը:
Նրա խոսքով՝ իրավիճակի կարգավորման գործում մեծ աշխատանք է կատարում Ռուսաստանի հայերի միության նախագահ Արա Աբրահամյանը, որն անցկացնում է բազմաթիվ հանդիպումներ:
«Ինչ վերաբերում է առեւտրի կետերում իրավիճակին, այդ թվում՝ «Ֆուդ Սիթի» շուկային, ապա այնտեղ արդեն հանգիստ գնում են հայկական համարներով ավտոմեքենաները, այնպես որ՝ հարցն ինչ-որ չափով լուծվել է: Կարգավորման փուլում է նաեւ «Կրոկուս» առեւտրի կենտրոններում առգրավված հայկական ապրանքների հետ կապված հարցը: Ակնհայտ է, որ որոշ ադրբեջանական ուժեր Հայաստանի սահմանին ռազմական անհաջողությունների ֆոնին փորձում են այդ իրադարձությունները փոխարկել այստեղ, ինչը դատապարտվում է, այդ թվում՝ ռուսների կողմից: Կարող եմ ասել, որ Ռուսաստանի մարզերի շարքում այդպիսի միջադեպերը գործնականում ընդհանրապես անհնար են՝ հաշվի առնելով հայերի եւ ադրբեջանցիների տոկոսային հարաբերակցությունը: Վերջերս խոսել եմ ՌՀՄ Լիպեցկի ներկայացուցիչների հետ, այնտեղ ամեն ինչ հանդարտ է: Նույնը վերաբերում է Ստավրոպոլի եւ Կրասնոդարի երկրամասերին»,- շեշտեց ՌՀՄ փոխնախագահը:
Նշենք, որ հուլիսի 12-ին հայ-ադրբեջանական սահմանին ռազմական էսկալացիայից հետո աշխարհի տարբեր երկրներում բախումներ են գրանցվում հայերի եւ ադրբեջանցիների միջեւ, որոնք վերածվում են ծեծկռտուքի:
Այսօր երեկոյան տեղեկություններ են ստացվել Մոսկվայում հայերի եւ հայկական պետհամարանիշներով ավտոմեքենաների վրա ավելի քան 10 հարձակման մասին:
NEWS.am-ի հետ զրույցում Ռուսաստանի հայերի միության անդամ Դավիթ Տոնոյանը պարզաբանեց, որ ադրբեջանցիների կողմից հարձակման են ենթարկվում ինչպես երիտասարդ, այնպես էլ տարեց հայերը։
Ըստ նախնական տվյալների՝ այս գիշեր ձերբակալվել է 50 ադրբեջանցի:
Հայերի եւ ադրբեջանցիների միջեւ բախումներ են գրանցվել նաեւ ԱՄՆ-ում, Գերմանիայում, Բելգիայում եւ եվրոպական այլ երկրներում:
Այս ֆոնին ադրբեջանցիներին պատկանող «Ֆուդ Սիթի» շուկան վերջերս հրաժարվեց հայկական գյուղմթերքից: Դրանից հետո Ռուսաստանի հայերը սոցցանցում ֆլեշմոբ նախաձեռնեցին՝ հայկական գյուղմթերքը վաճառել օգնելու համար, որի վաճառքն արգելված է նշված շուկայի տարածքում։
Բացի այդ, ահազանգեր են ստացվում այն մասին, որ ադրբեջանցի գործարար Արազ Աղալարովին պատկանող «Կրոկուս» առեւտրի կենտրոններից հանվել են բոլոր հայկական ապրանքները եւ փոխարինվել են ադրբեջանական ապրանքներով: