Թունիսի վարչապետը հայտարարել է կորոնավիրուսի նկատմամբ տարած հաղթանակի մասին

Թունիսը հաղթահարել է կորոնավիրուսային համավարակը, քանի որ այստեղ վարակման նոր դեպքեր այլևս չեն գրանցվում, գրում է iz.ru կայքը՝ հղում տալով երկրի վարչապետ Էլիս Ֆախֆախի հայտարարությանը։

«Մենք այս ճգնաժամից առողջության վերաբերյալ իրապես կարևոր եզրահանգումներով և նվազագույն վնասով ենք դուրս եկել»,- նշել է վարչապետը և հավելել, որ հունիսի 27-ից սկսած երկիրը կրկին բացում է սահմանները։

Բացի այդ, Ֆախֆախը հայտնել է համավարակի սկզբից ի վեր 25 000 համերկրացու՝ երկիր վերադառնալու մասին։

Թունիսում կորոնավիրուսով վարակման առաջին դեպքը գրանցվել է մարտի 2-ին․ վարակակիրն Իտալիայից վերադարձած 40-ամյա մի քաղաքացի է եղել։

Worldometers կայքի տվյալների համաձայն՝ Թունիսում գրանցվել է կորոնավիրուսով վարակման 1096 դեպք, հիվանդությունից մահացել է 19, ապաքինվել՝ 998 մարդ։