Դալասում դատարանը ոստիկանությանն արգելել է ցուցարարների դեմ արցունքաբեր գազ կիրառել

ԱՄՆ Դաշնային դատարանը ժամանակավոր արգելք է սահմանել Դալասում ցուցարարների զսպման նպատակով իշխանությունների և ոստիկանության կողմից արցունքաբեր գազի և ոչ մահաբեր զինատեսակի կիրառման վրա: Այս մասին հայտնում է Dallas Morning News պարբերականը:

РИА Новости-ի հաղորդմամբ՝ որոշումն ընդունվել է հինգշաբթի ուշ երեկոյան, երբ քաղաքացիական իրավունքների հարցով փաստաբանները վերջին մի քանի շաբաթների ընթացքում ցույցերի ժամանակ տուժած 2 ցուցարարների անունից դիմել էին դատարան:

Արգելքն ուժի մեջ է մտնում հինգշաբթի օրվանից և գործելու է մինչև սեպտեմբերի 9-ը:

Հիշեցնենք, որ զանգվածային բողոքի ցույցեր են սկսվել օրերս սոցցանցերում տարածված 10 րոպե տևողությամբ մի տեսանյութի հրապարակումից հետո, որում ոստիկանը Ջորջ Ֆլոյդ անունով սևամորթ իրավախախտին պառկեցրել է գետնին ու ծնկով սեղմում է նրա վիզը։ Անտեսելով տղամարդու աղաչանքներն ու շնչել չկարողանալու մասին խոսքերը՝ ոստիկանը հրաժարվում է նրան բաց թողնել, դրա հետևանքով Ֆլոյդը մահանում է։

Այս պատահարից զայրացած ցուցարարներն այժմ պահանջում են խստագույնս պատասխանատվության ենթարկել մարդասպան ոստիկանին և նրա հետ եղած մյուս երեք սպային, որոնք տեղում ոչինչ չեն ձեռնարկել տղամարդու կյանքը փրկելու համար։