Ֆիլիպինյան ավիաընկերության բորտուղեկցորդուհիները թռիչքի ժամանակ ծնունդ են ընդունել (լուսանկարներ)

Ֆիլիպինյան Philippine Airlines ավիաընկերության բորտուղեկցորդուհիները թռիչքի ժամանակ ծնունդ են ընդունել, հայտնում է ABS-CBN-ը։

Աղբյուրը մանրամասնում է, որ Դուբայ-Մանիլա չվերթի ժամանակ ուղևորներից մեկի մոտ ծննդաբերության ցավեր են սկսվել։ Այս մասին իմանալուց հետո բորտուղեկցորդուհիները սկսել են օգնություն ցուցաբերել կնոջը, այնուհետև կապ են հաստատել բժշկի հետ, որն էլ հեռակա վերահսկել է ծննդաբերության ողջ ընթացքը։

Նշվում է, որ դեպքը տեղի է ունեցել շաբաթ օրը, մոտ 9 կիլոմետր բարձրության վրա։

Ավիափոխադրող ընկերության ներկայացուցիչ Սիելո Վալյալունայի խոսքով՝ բորտուղեկցորդուհիների խումբը կարողացել է ճիշտ օգնություն ցուցաբերել, ինչի արդյունքում առողջ տղա է լույս աշխարհ եկել։

Ծննդաբերությունից հետո անձնակազմի անդամները, մայրը և նորածինը լուսանկարվել են․ կադրերում երևում է, որ բորտուղեկցորդուհիները բոլորն էլ պաշտպանիչ հագուստ և դիմակներ են կրում։