Ռուսաստանն ու Թուրքիան համաձայնության են եկել С-400-ների երկրորդ խմբաքանակի մատակարարման շուրջ

Թուրքիայի ռազմական արդյունաբերության գլխավոր վարչության քարտուղար Իսմայիլ Դեմիրը հայտարարել է, որ Ռուսաստանն ու Թուրքիան սկզբունքային համաձայնության են եկել С-400 հակաօդային պաշտպանության համակարգերի երկրորդ խմբաքանակի մատակարարման շուրջ: Այս մասին տեղեկացնում է թուրքական NTV հեռուստաընկերության կայքը:

«Մենք սկզբունքային համաձայնություն ունենք С-400-ի երկրորդ խմբաքանակի մատակարարման վերաբերյալ: Մնացել են տեխնոլոգիայի փոխադրման, դետալների միասնական արտադրության և ճանապարհային քարտեզի տեխնիկական աշխատանքները»,-հայտարարել է Դեմիրը:

Նրա խոսքով` Թուրքիան մտադիր է շահագործել գնված համակարգերը՝ չնայած կորոնավիրուսային իրավիճակին:

«С-400 համակարգը գնվում է օգտագործման համար: Վերջակետ: Այդ մասին մեկ անգամ չէ, որ ասվել է պետական բոլոր մակարդակներով: Աշխատանքը շարունակվում է»,-ասել է քարտուղարը:

Հիշեցնենք, որ Ռուսաստանի Դաշնության և Թուրքիայի միջև С-400 համակարգերի գնման շուրջ բանակցությունների մասին առաջին անգամ հայտնի էր դարձել 2016թ.-ի նոյեմբերին, իսկ վաճառքի մասին պայմանագիրը կնքվել էր 2017թ.-ի սեպտեմբերին, ընդ որում՝ ձեռք բերված զենիթահրթիռային 4 միավոր համակարգերի արժեքը 2,5 մլրդ դոլար է կազմել: