ՌԴ-ն ուսումնասիրում են հուլիսի 15-ից միջազգային ուղեւորատար թռիչքների վերսկսման հնարավորությունը

Ռուսական ավիաընկերություններն ուսումնասիրում են հուլիսի կեսերից միջազգային ուղեւորատար թռիչքները վերսկսելու հնարավորությունը, հայտնում է «Ինտերֆաքս»-ը՝ վկայակոչելով իրազեկ աղբյուրը:

«Մշակվում են միանգամից մի քանի խոշոր փոխադրողների կողմից հուլիսի 15-ից միջազգային թռիչքները վերսկսելու հնարավորությունը՝ կորոնավիրուսով վարակվածների թվի կրճատման կայուն դրական դինամիկայի եւ ինքնաթիռներում խիստ սանիտարական կանոնների պահպանման պայմանով»,- նշել է նա: Առաջինը կարող են վերականգնվել ԵԱՏՄ-ի եւ ԱՊՀ-ի երկրների հետ թռիչքները, նշել է գործակալության զրուցակիցը: «Այնուհետեւ, այլ երկրների սահմանների բացմանը զուգահեռ, կվերսկսվի օդային հաղորդակցությունը նաեւ դրանց հետ»,- հայտարարել է աղբյուրը:

COVID-19 համավարակի պատճառով Ռուսաստանի Դաշնությունը մարտի վերջին ամբողջությամբ դադարեցրել էր միջազգային ավիափոխադրումը՝ թույլ տալով միայն կանոնավոր թռիչքները Ռուսաստանի քաղաքացիների վերադարձի համար: Մարզերի միջեւ թռիչքների սահմանափակումներ չեն սահմանվել, սակայն կարանտինի պայմաններում ուղեւորների պահանջարկի անկման պատճառով ավիաընկերություններն իրենք սկսեցին չեղարկել չվերթները:

Մայիսի կեսին ՌԴ տրանսպորտի նախարարության ղեկավար Եվգենի Դիտրիխը լրագրողներին հայտարարել էր, որ գործակալությունը հույս ունի վերականգնել ներքին ավիափոխադրումները ընթացիկ տարվա հունիսից, միջազգային ավիափոխադրումները՝ հուլիսից: