New York Times-ի խմբագիրն աշխատանքից հեռացել է աղմկահարույց հոդվածի հրապարակման համար

Ամերիկյան New York Times-ի խմբագիրներից մեկը հեռացել է աշխատանքից պարբերականում Արկանզաս նահանգից հանրապետական սենատոր Թոմ Քոթոնի հոդվածի հրապարակումից հետո, որում սենատորը կոչ էր անում զորքերը հանել ընդդեմ բողոքի ակցիաներին մասնակցող քաղաքացիական բնակչության: Հոդվածի հրապարակումից հետո խմբագիրը կոշտ քննադատվել է:

Սենատոր Թոմ Քոթանի հոդվածը հրապարակվել էր «Ուղարկեք զորքերը» վերնագրով:

«Միակ բանը, որը կվերականգնի կարգուկանոնը փողոցում, դա ճնշող ուժի կիրառումն է, ցրելն ու օրինախախտներին ձերբակալելը»,-ասված է սենատորի հոդվածում: Հրապարակված հոդվածն ընթերցողների և պարբերականի լրագրողների բարկությունն է առաջացրել:

«New York Times-ի խմբագիր Ջեյմ Բենեթը հեռացել է աշխատանքից նրանից հետո, երբ մի քանի օր առաջ «Կարծիք» հատվածում, որը ղեկավարվում էր նրա կողմից, հրապարակվել է սենատորի՝ լրջորեն քննադատված հոդվածը. այն ամերիկյան քաղաքներում քաղաքացիական հուզումների նկատմամբ ռազմական պատասխանի կոչ էր անում»,-ասված է պարբերականի հաղորդագրությունում:

«Մենք եկանք եզրակացության, որ Ջեյմսը չի կարող թիմին տանել փոփոխությունների հաջորդ փուլ, որի կարիքը մենք ունենք»,-հայտարարել է պարբերականի խմբագիր և սեփականատիրոջ որդի Արթուր Սուլցբերգերը:

Բացի այդ, պարբերականը տեղեկացնում է, որ հինգշաբթի երեկոյան ավելի քան 800 աշխատակից հոդվածի հրապարակման դեմ նամակ է ստորագրել:

Ուրբաթ օրը բոլոր աշխատակիցների առցանց ժողովի ժամանակ 54-ամյա Բենեթը ներողություն էր խնդրել հոդվածի տպագրման համար:

ԱՄՆ-ում զանգվածային ցույցերը մեկնարկել են մայիսի 25-ին Ջորջ Ֆլոյդ անունով աֆրոամերիկացի իրավախախտի սպանությունից հետո: Մինեապոլիսի ոստիկանության նախկին սպան, ծնկով սեղմած պահելով տղամարդու պարանոցը, խեղդամահ է արել նրան: Կատարվարծից զայրացած քաղաքացիները պահանջում են խստագույնս պատժել ինչպես սպանության հեղինակին, այնպես էլ նրա կողքին կանգնած մյուս երեք ոստիկաններին, որոնք ոչինչ չեն արել Ֆլոյդին փրկելու համար: