Հարուստ ռուսները համավարակի ընթացքում որոշել են բունկերներ ձեռք բերել

COVID-19 համավարակը եւ վախը, թե ինչ է լինելու դրա ավարտից հետո, երբ աշխարհը կբախվի տնտեսության կրճատմանն ու կենսամակարդակի անկմանը, ակտիվացրել է բունկերների եւ ապաստարաններիպահանջարկը մեծահարուստների շրջանում ինչպես ամբողջ աշխարհում, այնպես էլ Ռուսաստանում, գրում է ռուսական «Ֆորբս» պարբերականը:

Բունկերների եւ պաշտպանիչ կառույցների ամենազարգացած արտադրությունն ԱՄՆ-ում է: Ամերիկյան արդյունաբերության խոշոր ներկայացուցիչները, «Ֆորբս»-ի հարցմանն ի պատասխան, նշել են, որ պահանջարկ են գրանցում այդ թվում նաեւ ռուսաստանցի հաճախորդների կողմից: «Ռուսները մեզ շատ են դիմել, եւ այս տարի մենք երկու ապաստարան ենք վաճառել ռուսներին»,- Forbes-ին պատմել է ամերիկյան խոշոր բունկեր արտադրող Rising S Company-ի գլխավոր տնօրեն Հարի Լինչը: Նրա խոսքով՝ օբյեկտներից յուրաքանչյուրը մոտ 46 քմ տարածք ունի, դրանք լիովին հագեցված են եւ հնարավորություն ունեին զտել միջուկային մասնիկները: Նման օբյեկտի արժեքը 150.000 դոլար է: «Մենք դրանք հասցրել ենք ԱՄՆ առաքման նավահանգիստներ, ուստի ես տեղյակ չեմ վերջնական նպատակակետերից»,- ասել է Լինչը:

Ընդհանուր առմամբ, ըստ Լինչի, 2020 թվականի առաջին երեք ամիսներին ապաստանի պահանջարկը նախորդ տարվա նույն ժամանակահատվածի համեմատ աճել է 2000 տոկոսով:

Կալիֆորնիական Vivos ընկերությունում, Forbes-ի հարցմանն ի պատասխան, հաստատել են նաեւ Ռուսաստանից հաճախորդների կողմից հայտերի առկայությունը՝ հրաժարվելով կոնկրետ անուններ նշելուց: Ընդհանուր առմամբ, բունկեր պատրաստելու պատվերները եւ դիմումներն աճել են ավելի քան 1000 տոկոսով, վաճառքն աճել է ավելի քան 400 տոկոսով եւ երկրաչափական պրոգրեսիայով աճում է:

Նոր Vivos բունկերային համալիրի կառուցումը կարող է 3-ից 12 ամիս տեւել՝ կախված նյութերի եւ աշխատուժի առկայությունից, գտնվելու վայրից: Բոլոր ապաստարաններն օդային համակարգեր ունեն՝ ստորգետնյա տարածք մուտք գործելուց առաջ բոլոր պաթոգեն միկրոօրգանիզմներն ու ռադիոակտիվ մասնիկները հեռացնելու համար: Ընկերությունը նաեւ բունկեր վարձակալելու հնարավորություն է ընձեռում: «Հաճախ պատահում է, որ օտարերկրյա հաճախորդները ապաստան են գնում Միացյալ Նահանգներում՝ նպատակ ունենալով տեղափոխվել այստեղ, երբ ժամանակը գա»,- պարզաբանել են ընկերությունում:

Ի՞նչ են վերցնում

Պաշտպանիչ կառույցների պահանջարկը մեծապես աճել է, ամերիկյան գործընկերների հետ համաձայնել է Անդրեեւը «Սպեցգեոպրոյեկտ»-ից. եթե նորմալ ժամանակներում ընկերությունն ամսական մի այդպիսի հաստատություն է ստեղծում, ապա այժմ՝ երեք, իսկ ապրիլին «Սպեցգեոպրոյեկտ»-ը հինգ պատվեր է ստացել:

Լիարժեք ստորգետնյա բունկերների կառուցման հիմնական պահանջարկը գալիս է Մոսկվայից (Նոր Ռիգա, Ռուբլյովկա, Յարոսլավկա, Դմիտրովկա), Սանկտ Պետերբուրգից եւ մերձակա շրջաններից, ասում է Անդրեեւը: Սակայն, ըստ նրա, առավել մեծ պահանջարկ ունեն ոչ թե բունկերները, այլ, այսպես կոչված, անվտանգության սենյակները՝ պաշտպանված պարագիծ, որը տեղադրվում է արդեն կառուցված տան մեջ եւ հագեցած է հերմետիկ պատուհաններով եւ դռներով, ավտոնոմ էլեկտրամատակարարմամբ եւ կապով:

Նման սենյակները կարող են պաշտպանել ոչ միայն օդի եւ գազի աղտոտումից, այդ թվում՝ մարտական ​​կամ թունավոր, այլ նաեւ ապահովել սեփականատերերի անվտանգությունն անկարգությունների դեպքում, բացատրում է Անդրեեւը:

Պաշտպանիչ սենյակները հագեցված են գեներատորներով, որոնք կարող են էլեկտրաէներգիա արտադրել արտաքին անջատման դեպքում, ապահովված են մարտկոցների անկախ համակարգով, օդափոխությամբ, ջրով եւ սննդիպաշարներով: Սենյակը հագեցած է նաեւ սենսորներով, որոնք որոշում են օդում թունավոր նյութերի, աղտոտվածության եւ ճառագայթահարման մակարդակը, վիդեո հսկողության համակարգերով եւ օդի վերականգնման գործառույթով, ինչը թույլ է տալիս ձեզ հրդեհի դեպքում մի քանի օր մնալ ապաստարանում:

Այլ պայմաններում այսպիսի սենյակում կարելի է ապրել մինչեւ մեկ ամիս՝ առանց որեւէ դժվարություն զգալու. այն այնպես է նախագծված, որ «մարդուն հանել այնտեղից շատ դժվար է», շեշտել է Անդրեեւը: Նման սենյակի կառուցման արժեքը սկսվում է 3 միլիոն ռուբլիից, ստորգետնյա լիարժեք բունկեր արժեքը՝ 10 միլիոն ռուբլիից: Իր պատմության մեջ ամենամեծ օբյեկտը՝ 400 քմ բունկերը, ընկերությունը կառուցել է Տվերի շրջանում, նախագծի արժեքը 2 միլիոն դոլար է:

Բունկերների մեկ այլ մայրաքաղաքային կառուցող ընկերության՝ «Բունկերստրոյ»-ի գները սկսվում են 890,000 ռուբլիից (առանց տեղադրման եւ առաքման)՝ ապաստարանի բազային տարբերակի համար (15 մետրանոց տարածք՝ նստատեղերով, լվացարանով եւ օդը փոշուց զտելու համակարգով), 7.6 միլիոնի դիմաց հաճախորդին առաջարկվում է 60 մետր մակերեսով սենյակ, ռադիոակտիվ փոշուց, թունավոր նյութերից պաշտպանությամբ, լոգարանով եւ կոյուղիով, կապի եւ ջեռուցման համակարգերով: Ընդ որում, «խաղաղ» ժամանակ ընկերությունն առաջարկում է բունկերը որպես մարզադահլիճ, նարգիլեանոց, գինու նկուղ կամ տնային կինոթատրոն օգտագործել:

Անդրեեւը կարծում է, որ «նրանք (հաճախորդները) հասկանում են, որ աշխարհը փոխվել է, որ ամեն ինչ այնքան կայուն եւ առողջ չէ, որքան նախկինում էր. այսօր՝ համավարակ, կորոնավիրուս, վաղը՝ մեկ այլ բան»,- նշել է գործարարը: