Շախմատի Ազգերի գավաթ. Սուպերեզրափակչին մնացին հաշված ժամեր

Շախմատի Ազգերի գավաթ առցանց խաղարկությունում այսօր խաղային վերջին օրն է: Պայքարի մեջ մնացել է 2 թիմ: Հաղթողի կոչումը վիճարկելու են Միացյալ Նահանգների ու Չինաստանի թիմերը:

Չինաստանի ընտրանին ֆանտաստիկ խաղ ցուցադրեց՝ 10 տուրում տանելով 8 հաղթանակ, խաղալով 1 ոչ-ոքի ու կրելով 1 պարտություն: Միակ պարտությունը Չինաստանը կրեց հիմնական փուլի վերջին տուրում՝ Միացյալ Նահանգների թիմից: Եթե Չինաստանը չպարտվեր այդ դիմակայությունում, սուպերեզրափակչում որպես մրցակից կստանար Եվրոպայի թիմին: Միգուցե, սա էլ մարտավարություն էր: Իսկ Առաջին շրջանում Չինաստանը 2.5-1.5 հաշվով հաղթել էր:

Միացյալ Նահանգների թիմը մեծ դժվարությամբ տիրացավ բաղձալի ուղեգրին: Ինչ-որ տեղ նրանց ուղեգիրը նվաճելու գործում ավանդ ունեցավ Լևոն Արոնյանը՝ պարտվելով Ալիրեզա Ֆիրուջային: ԱՄՆ-ն 10 տուրում տարավ 6 հաղթանակ, կրեց 3 պարտություն և խաղաց 1 ոչ-ոքի: 3 պարտությունից 2-ը կրել է Եվրոպայի թիմից, մեկը՝ Չինաստանից:

Հավանական կազմեր.

Բնականաբար, թիմերը կխաղան մարտական կազմերով: Չինաստանը կխաղա Լիրեն, Հաո, Յանգժի, Յիֆան քառյակով, իսկ Միացյալ Նահանգները կխաղա Նակամուրա, Կարուանա, Սո, Կրուշ քառյակով: