Ռուսաստանցիներին կսկսեն տուգանել գիշերները հաչացող շների պատճառով

Վարչական իրավախախտումների մասին բարեփոխված օրենսգրքում կներառեն հոդված գիշերային ժամերին անդորրը խախտելու համար պատասխանատվության մասին, հայտնում է ՏԱՍՍ-ը:

Երկրի արդարադատության նախարարությունից նախագծի հանրային քննարկումների արդյունքներով հստակեցրել են, որ, ի թիվս այլոց, ռուսաստանցիներին տուգանելու են 23:00-ից մինչեւ 07:00 հաչացող շների եւ մշտապես միացող ավտոմեքենայի ազդանշանային համակարգի պատճառով: Սա ամրագրվելու է Վարչական իրավախախտումների մասին օրենսգրքի 6-րդ մասի 14.1 հոդվածում:

Իրավախախտում է համարվելու նաեւ բարձր երաժշտությունը, երաժշտական գործիքներ նվագելը, վերանորոգման աշխատանքներ կատարելը:

Այս պահին այդպիսի նորմ է գործում ռուսական բոլոր 85 սուբյեկտներում, բայց դաշնային օրենսդրության մեջ ամրագրված չէ: