Մեկ ամսում շուրջ 150 մլն դոլարի աջակցություն. ո՞ր երկրներն են ձեռք մեկնել Հայաստանին COVID-19–ի դեմ պայքարի համար

Վերջին մեկ ամսվա ընթացքում նոր տեսակի կորոնավիրուսի դեմ պայքարի շրջանակներում մեկ տասնյակ պետություններ և միջազգային կազմակերպություններ Հայաստանին տրամադրել կամ տրամադրելու են շուրջ 150 մլն դոլարի օգնություն։ NEWS.am–ն առանձնացրել է Հայաստանին տրամադրված աջակցությունները և աջակցության խոստումները՝ համադրելով մինչ օրս բաց աղբյուրներում հրապարակված պաշտոնական տվյալները։

Եվրոպական միություն

Հայաստանում ԵՄ գրասենյակը ապրիլի 2–ին հայտարարեց, որ Եվրոպական միությունը 51 միլիոն եվրո աջակցություն կտրամադրի Հայաստանին՝ կորոնավիրուսային համավարակի դեմ միասին պայքարելու նպատակով։ Նախատեսվում է աջակցությունն ուղղել բժշկական սարքավորումների մատակարարման, բժշկական և լաբորատորիաների անձնակազմի համար դասընթացների կազմակերպման, ՓՄՁ-ներին և բիզնես հանրությանը ցուցաբերվող աջակցության, ինչպես նաև կորոնավիրուսային վարակի բռնկման հետևանքով տուժած անձանց սոցիալական և հումանիտար օգնության տրամադրմանը: Օրեր անց Հայաստանում Եվրոպական միության պատվիրակությունը տեղեկացրեց, որ ԵՄ–ն աջակցությունը մեծացրել է և անհետաձգելի, կարճաժամկետ կարիքների համար պատրաստ է Հայաստանին տրամադրել 92 մլն եվրո։ Իսկ արդեն ապրիլի 17–ին հայտնի դարձավ, որ Եվրոպական միությունը Հայաստանին կտրամադրի 456.500 եվրո օգնություն գյուղատնտեսության ոլորտում կորոնավիրուսի ճգնաժամի բացասական ազդեցությունը մեղմելու նպատակով: Աջակցությունը կտրամադրվի Եվրոպական միության կողմից ֆինանսավորվող և Ավստրիական զարգացման համագործակցության կողմից համաֆինանսավորվող «ԵՄ Կանաչ գյուղատնտեսության նախաձեռնություն Հայաստանում (EU-GAIA)» ծրագրի բյուջեի շրջանակներում։ Ապրիլի 21–ին կառավարությունում հրավիրված մամուլի ասուլիսի ժամանակ Հայաստանի փոխարտգործնախարար Ավետ Ադոնցը հայտարարեց, որ ԵՄ–ն ԱՀԿ–ի միջոցով Հայաստանին տրամադրելու է 3.5 մլն եվրո օգնություն 90 մլն օգնության ընդհանուր ծրագրից։

Ամերիկայի Միացյալ Նահանգներ

Մարտի 28–ին ԱՄՆ-ի պետքարտուղարությունը տեղեկացրեց կորոնավիրուսի համաճարակի դեմ պայքարի շրջանակում Հայաստանին օգնություն ցուցաբերելու մասին։ Մասնավորապես՝ ԱՄՆ-ի պետքարտուղարությունը և Միջազգային զարգացման գործակալությունը նախատեսում են Հայաստանին տրամադրել 1.1 մլն ԱՄՆ դոլար, որը կուղղվի Հայաստանում առողջապահության ոլորտի բարելավմանը, մասնավորապես լաբորատոր համակարգերի զարգացմանը, կորոնավիրուսի դեպքերի բացահայտման հնարավորությունների մեծացմանը, փորձագիտական շրջանակների աջակցությանն ու մի շարք այլ ոլորտներին: Ավելի ուշ Հայաստանում ԱՄՆ-ի դեսպան Լին Թրեյսին հայտարարեց աջակցության ծավալների մեծացման մասին.

«Ի հավելումն նախկինում նշված 1 մլն 100 հազար դոլարի՝ որոշում է կայացվել Հայաստանին հատկացնել ևս 600 հազար դոլար»,–նշել է դեսպանը, հավելելով, որ այս աջակցությունը կտրամադրվի UNICEF–ի միջոցով։ Այնուհետև Ամերիկայի Հայ դատի հանձնախումբը (ANCA) հայտարարեց ԱՄՆ Պետքարտուղարության կողմից ևս 25 մլն դոլարի աջակցությության մասին։ Հաղորդագրության համաձայն՝ Ամերիկայի Հայ դատի հանձնախումբը աջակցության խնդրանքով դիմել էր ԱՄՆ պետքարտուղարությանը. դրական որոշմամբ պատասխանը ստորագրել է Կովկասի և Արևելյան Եվրոպայի հարցերով պետքարտուղարի օգնականի տեղակալ Ջորջ Քենթը:

Չինաստանի Ժողովրդական Հանրապետություն

Մարտի 23–ին ՀՀ-ում ՉԺՀ դեսպան Թիեն Ըրլունը ՀՀ ԱԳ նախարարի տեղակալ Ավետ Ադոնցի հետ հեռախոսազրույցի ընթացքում հայտարարեց, որ Չինաստանը պատրաստ է Հայաստանին հավելյալ աջակցություն ցուցաբերել՝ անհատույց տրամադրելով 110.000 ԱՄՆ դոլար արժողությամբ բժշկական հատուկ արտահագուստ և թոքերի արհեստական օդափոխության սարքեր։

Շվեյցարիա

Մարտի 26–ին հայտնի դարձավ, որ Շվեյցարիայի կառավարությունը COVID-19 նոր տեսակի կորոնավիրուսի դեմ պայքարում Հայաստանի կառավարությանը որպես օգնություն կհատկացնի 40 հազար շվեյցարական ֆրանկ։ Շվեյցարիայի դեսպանության տարածած հայտարարության մեջ նշվում է, որ նախարարության եւ զարգացման ու համագործակցության շվեյցարական գործակալության միջեւ ստորագրված համաձայնագրի շրջանակում ձեռք է բերվելու թոքերի արհեստական օդափոխման 2 սարք:

Ռուսաստանի Դաշնություն

Հայաստանի Հանրապետության և Ռուսաստանի Դաշնության զինված ուժերի երկկողմ փոխհամագործակցության շրջանակներում նոր կորոնավիրուսային վարակի տարածման կանխարգելման և հակահամաճարակային միջոցառումների կազմակերպմանն աջակցման նպատակով ապրիլի 7–ին Հայաստանի Հանրապետություն ժամանեց ՌԴ զինված ուժերի մասնագետների թիմը՝ իրենց հետ բերելով COVID-19 վարակի հետազոտություններ կատարելու հնարավորությամբ շարժական լաբորատորիա։ Պաշտպանության նախարարության տրամադրության տակ այդ համակարգերը հնարավորություն կընձեռեն իրականացնել ՀՀ զինված ուժերի և ՀՀ-ում տեղակայված ՌԴ 102-րդ ռազմաբազայի անձնակազմի հետազոտությունները:

Շարժական լաբորատորիան սկսել է աշխատել ապրիլի 9-ից։

Իսկ արդեն ապրիլի 10–ին ԵԱՏՄ միջկառավարական խորհրդակցության ժամանակ «Ռոսպոտրեբնադզոր»-ի տնօրեն Աննա Պոպովան հայտարարեց, որ որոշում է ընդունվել Հայաստանին ռեագենտներ տրամադրել կորոնավիրուսի 20 000 հետազոտում անցկացնելու համար: Նույն օրը նախատեսված օգնությունը հասավ Հայաստան։

Համաշխարհային բանկ (ՀԲ)

Ապրիլի 3–ին Համաշխարհային բանկի հայաստանյան գրասենյակը հաղորդագրություն տարածեց՝ հայտնելով, որ ՀՀ առողջապահության նախարարության խնդրանքով Համաշխարհային բանկը 3 մլն ԱՄՆ դոլար է հատկացրել Հայաստանին՝ կորոնավիրուսի հաստատված ախտորոշմամբ անձանց ինտենսիվ թերապիայի համար անհրաժեշտ սարքավորումների ու պարագաների ձեռքբերման հրատապ կարիքները բավարարելու համար։ «Այս միջոցները կօգնեն «Հիվանդությունների կանխարգելումն և վերահսկում» ընթացիկ ծրագրի շրջանակներում ձեռք բերել թոքերի արհեստական օդափոխության 50 սարք՝ 1.35 մլն ԱՄՆ դոլար արժողությամբ», - նշված է հաղորդագրությունում:

ՄԱԿ–ի Ատոմային էներգիայի միջազգային գործակալություն (ՄԱԳԱՏԷ)

Ապրիլի 21–ին կառավարությունում հրավիրված մամուլի ասուլիսի ժամանակ ՀՀ արտաքին գործերի նախարարի տեղակալ Ավետ Ադոնցը հայտարարեց որ իրականացվում է 6 մլն ԱՄՆ դոլար բյուջե ունեցող օգնության ծրագիր ՄԱԳԱՏԷ-ի` Ատոմային էներգիայի միջազգային գործակալության կողմից, որի շրջանակներում Հայաստան կբերվեն կորոնավիրուսի նոր տիպի 2000 թեստ` ստեղծված ատոմային մեթոդների հիման վրա, որոնք մի քանի ժամվա ընթացքում տալիս են թեստավորման արդյունքները։