Տիեզերքից արված լուսանկարները պատկերում են, թե ինչպես են փոխվել Վենետիկի ջրանցքները կարանտինի ընթացքում

 Եվրոպական տիեզերական գործակալությունը երկու լուսանկար է հրապարակել, որոնք պատկերում են իտալական Վենետիկ քաղաքի տեսքը տարբեր ժամանակներում:

Ինչպես փոխանցում է CNN-ը, տիեզերքում ստացված կադրերը, որոնք պատկերվել են 1 տարվա տարբերությամբ, ցույց են տալիս, թե ինչպիսի փոփոխությունների են ենթարկվել քաղաքի հայտնի ջրանցքները համավարակի ընթացքում:

Լուսանկարներից մեկն արվել է 2019 թվականի ապրիլի 19-ին, մյուսը՝ 2020-ի ապրիլի 13-ին: Դրանցում պարզ երևում է, թե ինչքան է պակասել նավակների քանակը Covid-19-ի պատճառով սահմանված կարանտինի ժամանակահատվածում:

Վենետիկը հայտնի է իր ջրային ուղիների ցանցով: Սովորաբար զբոսաշրջիկներով լեփ-լեցուն քաղաքը դատարկվել է մարտի 8-ից ի վեր սահմանված կարանտինից հետո, ինչի արդյունքում զգալիորեն մաքրվել է նաև ջուրը: