«Ինձ Վրաստանի ներկայացուցչի ժամանակավոր կարգավիճակ տվեք, և ես 5,5 մլրդ դոլար կբերեմ». Սաակաշվիլի

Վրաստանի երրորդ նախագահ Միխեիլ Սաակաշվիլին վրացական իշխանություններին առաջարկել է մինչև աշուն հետաձգել իր նկատմամբ հարուցված քրեական գործերի քննությունը և իրեն ժամանակավորապես տալ վրացական ղեկավարության ներկայացուցչի կարգավիճակ. փոխարենը նա խոստանում է արտասահմանյան գործընկերների միջոցով երկիր բերել 5,5 միլիարդ դոլար կորոնավիրուսի հետևանքով երկրի տնտեսությանը կրած վնասը փոխհատուցելու համար: Այս մասին տեղեկացնում է pia.ge կայքը:

«Վերջիվերջո, ի տարբերություն ձեզ, ես ճանաչում եմ Եվրոպայի առաջնորդների մեծ մասին: Դուք ոչ ոքի չգիտեք ու ոչ ոք ձեզ չի հարգում: Եկեք մեր բոլոր իրավական վեճերը թողնենք ապագային, մորատորիում հայտարարենք մինչև աշուն, կշարունակենք իմ դատաքննությունը համավարակի անցնելուց հետո: Ինձ Վրաստանի ներկայացուցչի ժամանակավոր կարգավիճակ տվեք միայն մեկ` արտասահմանյան օգնություն ստանալու հարցով: Երաշխավորում եմ, որ 5,5 միլիարդ դոլար կբերեմ: Ես շատ կօգնեմ վրացական տնտեսությունը փրկելու գործում»,-ասել է Սաակաշվիլին;

Վրաստանում, վերջին տվյալներով, գրանցվել է կորոնավիրուսով վարակման 399 դեպք, 4 մարդ մահացել է:

Նոր տեսակի կորոնավիրուսով վարակվածների թիվն ամբողջ աշխարհում 2 407 439 է, մահացել է 165 073 մարդ: Առողջապահության համաշխարհային կազմակերպությունը կորոնավիրուսի համավարակ է հայտարարել մարտի 11-ին: Վիրուսը տարածվել է 210 երկրում: Համաճարակի բռնկման մասին Չինաստանի իշխանություններն ԱՀԿ-ին հայտնել են դեկտեմբերի 31-ին: