ԱՄՆ մի շարք նահանգներում կարանտինի դեմ բողոքի ցույցեր են անցկացվել

Անցած օրերին Տեխասում, Ինդիանայում, Նյու Հեմփշիրում, Նեւադայում, Մերիլենդում, Յուտայում եւ Վիսկոնսինում բողոքի ցույցեր են անցկացվել կորոնավիրուսի համավարակի պատճառով հայտարարված կարանտինի դեմ, հայտնում է Vox-ը:

Բողոքի ցույցերը հաջորդել են անցյալ շաբաթ Ֆլորիդայում, Հյուսիսային Կարոլինայում, Վիրջինիաում, Միչիգանում, Մինեսոտայում, Այդահոյում, Կենտուկիում եւ Կալիֆոռնիայում տեղի ունեցած համանման ակցիաներին: Բողոքի ցույցերի ընթացքում ցուցարարները շատ մոտ էին կանգնած միմյանց` նահանգապետներին քննադատող պաստառներով եւ կոչերով` թույլ տալ իրենց վերադառնալ աշխատանքի:

Տեխաս նահանգի Օսթին քաղաքում անցկացվող բողոքի ցույցի ժամանակ ցուցարարները ողջունել են Infowars դավադրության տեսության կայքի հիմնադիր Ալեքս Ջոնսին, ով բղավում էր, որ «բոլորն էլ գիտեն, որ մենք կենսաբանական զենքի հարձակման ենք ենթարկվել»: Դավադրության տեսությունից բացի, ցուցարարների մեծ մասը վրդովված էր աշխատանքի բացակայությունից:

«Տանը նստելու» հրահանգը հանգեցրել է բազմաթիվ ընկերությունների փակմանը եւ դարձավ տնտեսական աղետ է դարձել միլիոնավոր ամերիկացիների համար:

Ըստ ԱՄՆ Աշխատանքի նախարարության վերջին զեկույցի` ավելի քան 22 միլիոն ամերիկացի` ԱՄՆ աշխատուժի մոտ 14 տոկոսը, մարտի կեսերից դիմել է գործազրկության նպաստի վճարման համար: Մինչ Կոնգրեսը հաստատեց գործազրկության լրացուցիչ նպաստները, բազմաթիվ նոր գործազուրկ ամերիկացիներ փորձում էին ստանալ այդ նպաստները, ինչը բարդանում էր բյուրոկրատական ձգձգումներով:

Նախագահ Դոնալդ Թրամփը տնտեսության արագ վերականգնում է խոստացել եւ հայտարարել է ԱՄՆ-ում բիզնեսը բացելու վրաբերյալ իր վարչակազմի մտադրության մասին, չնայած որոշումը, ի վերջո, կմնա նահանգների հայեցողությանը:

Ուրբաթ օրը մի քանի նահանգ սկսել էր թուլացնել որոշ սահմանափակումներ, ինչպիսիք են լողափերի, պուրակների եւ գոլֆի դաշտերի բացումը, իսկ այս շաբաթվա սկզբին արեւելյան եւ արեւմտյան ափերի եւ Միջին Արեւմուտքի մի քանի նահանգներ հայտարարեցին տնտեսության վերականգնման պլանի վերաբերյալ տարածաշրջանային համաձայնագրերի կնքման մասին:

Չնայած վերջին օրերի բողոքներին եւ դաշնային ճնշմանը` թվում է, որ ամերիկացիների մեծամասնությունը դեռ պատրաստ չէ վերադառնալ նորմալ կյանքին: Եւ, չնայած նրան, որ ցուցարարները հանգստյան օրերին գուցե մեծ աղմուկ բարձրացրեցին, սակայն հարցումները ցույց են տալիս, որ նրանք փոքրամասնություն են:

Ապրիլի 7-ից 12-ը Pew հետազոտական կենտրոնը հարցում էր անցկացրել գրեթե 5000 մարդու շրջանում, որոնց 66 տոկոսը նշել է, որ մտավախություն ունի, որ սոցիալական հեռավորության պահպանումը չափից ավելի շուտ կավարտվի: Իսկ ապրիլի 10-ից 12-ը Gallup-ի կողմից անցկացված հարցումը ցույց էր տվել, որ ամերիկացիներն ավելի շատ անհանգստացած են Covid-19-ով վարակման, քան սահմանափակումների պատճառով լուրջ ֆինանսական դժվարությունների կապակցությամբ: