Չեխիայում աստիճանաբար թուլացնում են կարանտինի ռեժիմը

Չեխիայում կորոնավիրուսով ախտահարվածների թիվը հասել է 6 հազար 437-ի, մահացել է 170 մարդ, ապաքինվել է 979 հիվանդ:

Կառավարությունը հրապարակել է կարանտինի ռեժիմն աստիճանաբար մեղմելու ծրագիրը, որն ուժի մեջ կմտնի առաջիկա շրջանում այն դեպքում, եթե իրավիճակը երկրում կբարելավվի:

Կառավարությունը, մասնավորապես, մտադիր է ապրիլի 20-ից թույլատրել փոքր խանութների աշխատանքը, մեծ խանութները կվերաբացվեն մայիսի 11-ից, իսկ ռեստորանները և սրճարանները՝ հունիսի 8-ից:

Ապրիլի 20-ից հնարավոր կլինի դպրոցների և համալսարանների աշխատանքը, սակայն մինչև ամառային արձակուրդներ կանոնավոր դասընթացներ, հավանաբար, չեն լինի:

Չեխիայի կառավարությունը վերահաստատել է սոցիալական հեռավորություն պահպանելու և հանրային վայրերում դիմակներ պարտադիր կրելու անհրաժեշտությունը: