Հրապարակվել են արքայադուստր Դիանայի սկանդալային ձայնագրությունները

Արքայադուստր Դիանայի և արքայազն Չարլզի ամուսնությունն ամենաշատ քննարկված ու բազմաթիվ սկանդալների հետ մտազուգորդվող միություններից է, որի վերաբերյալ նոր մանրամասներ են ի հայտ եկել:

Ինչպես նշում է The Daily Mail-ը, օրերս հրապարակվել են Դիանայի կենդանության օրոք արված ձայնագրություններ, որում Մեծ Բրիտանիայի թագավորական ընտանիքի նախկին անդամը պատմում է իր ամուսնական կյանքի ու տառապանքների մասին:

Ձայնագրություններից մեկում արքայադուստր Դիանան պատմում է, որ իրենց ամուսնությունից կարճ ժամանակ անց արքայազն Չարլզը վերսկսել է սիրավեպը Կամիլա Պարկեր Բոուլսի հետ:

Դիանայի խոսքով՝ իրենց ընտանիքում ու փոխհարաբերություններում տիրող քաոսը գնալով ավելի էր խորանում, ինչի պատճառով ինքն առաջնեկով՝ արքայազն Ուիլյամով, 4 ամսական հղի լինելու ժամանակ ինքնասպանության փորձ է արել ու գլորվել աստիճաններից:

Միջադեպը տեղի է ունեցել թագավորական ընտանիքի նորֆոլքյան նստավայրում:

«Երբ Ուիլյամով հղի էի ու գտնվում էի 4 ամսում, ինձ աստիճաններից ցած գլորեցի՝ փորձելով գոնե այդկերպ գրավել ամուսնուս ուշադրությունն ու ստիպել նրան լսել ինձ: Չարլզին անկեղծորեն ասացի, որ իր ուշադրությունը գրավելու համար եմ արել դա, քանի որ հուսահատության մեջ էի: Իսկ նա ընդամենն ասաց, որ ես ամեն ինչ բարդացնում եմ ու սուտ լաց լինում: Այդ խոսքերից հետո նա ինձ թողեց ու գնաց ձիարշավի»,-անկեղծացել է արքայադուստրը:

Ձայնագրություններից նաև պարզ է դառնում, որ ընտանեկան կոնֆլիկտների ժամանակ Դիանան ոչ մեկից աջակցություն չէր ստանում. Չարլզի ծնողները՝ թագուհի Էլիզաբեթ 2-րդն ու արքայազն Ֆիլիպը, պաշտպանում էին որդուն և նույնիսկ գտնում, որ եթե ամուսնությունն արդեն մի քանի տարի է, ինչ հաջող չէ, ապա Չարլզն իրավունք ունի իրեն ազատ տղամարդու պես պահել:

«Շրջապատում բոլորն ասում էին, որ ես անընդհատ խնդիրներ եմ ստեղծում ամուսնուս համար, ինձ պահում եմ երես առած երեխայի պես, բայց ոչ ոք չգիտեր, թե ինչ է կատարվում ներսումս: Իրականում ես օգնության կարիք ունեի, սակայն կողքիս հավատարիմ ոչ ոք չկար: Բացի այդ, ինձ ժամանակ էր հարկավոր նոր կարգավիճակին հարմարվելու համար.դա նրանք ևս չէին հասկանում: Չարլզի հետ ամուսնանալուց հետո փորձել եմ կտրել երակներս, ինձ գցել եմ կոտրված ապակիների վրա, պատուհանից իրեր եմ դուրս շպրտել, ուստի՝ չեմ զարմանում, որ Քենսինգթոնյան պալատում մարդիկ ինձ տարօրինակ էին համարում: Ես կորցրել էի քունս ու անընդհատ լացում էի»,-ձայնագրության մեկ այլ հատվածում ասում է Դիանան:

Արքայադուստրը վերհիշել է մի միջադեպ, որն իր մեջ խորն էր տպավորվել: Մի անգամ, երբ նա լողավազանում է եղել փոքրիկ Ուիլյամի հետ, որդին իրեն ասել է, որ նա աշխարհում ամենաեսասեր կինն է:

«Ես ապշեցի՝ որդուցս նման բան լսելով: Ճիշտ է, ես բազմաթիվ թերություններ ունեմ, բայց կարող եմ վստահ ասել, որ ես եսասեր չեմ: Երբ Ուիլյամին հարցրի, թե որտեղ է նման բան լսել, նա ասաց, որ հայրը հաճախ է դա կրկնում: Եվ, իսկապես, Չարլզն անընդհատ ինձ շեշտում էր, որ ես եսասեր կին եմ ու միայն իմ մասին եմ մտածում:

Բացի այդ, բոլորը քննադատում էին իմ արտաքինը: Չարլզն ասում էր, որ ես չափազանց նիհար եմ, մյուսների կարծիքով՝ տեսքս այդքան էլ լավը չէր»,- շարունակել է Դիանան:

Կնոջ խոսքով՝ ամուսնանալիս ինքը հույսեր էր փայփայում առ այն, որ Չարլզը լինելու է հոգատար, սիրող ամուսին ու հայր, սակայն իրականությունը եղավ շատ դաժան ու հիասթափեցնող:

«Նա ինձ անտեսում էր ամենուր և ամեն վայրկյան: Բոլորին ասում էր, որ անհաջող ամուսնության պատճառը ես եմ, քանի որ անընդհատ վատառողջ եմ: Բաց ոչ մեկն ինձ գեթ մեկ անգամ չհարցրեց, թե ես ինչ եմ մտածում այդ հարցի շուրջ: Մի անգամ, նույնիսկ, երբ ուզում էի Չարլզի հետ ինչ-որ հարց քննարկել, իսկ նա սովորականի պես անտեսեց ինձ, վերցրի նրա փոքրիկ դաշույնն ու կրծքավանդակիս հատվածում վնասեցի ինձ»,-պատմել է Դիանան:
Հիշեցնենք, որ այս ձայնագրությունների ամբողջական տարբերականները նոր են հրապարակվել: