ԵՄ-ն 100 մլրդ եվրո կծախսի կորոնավիրուսի ճգնաժամի ֆոնին աշխատատեղերի պահպանման համար. The Guardian

 Եվրոպական հանձնաժողովի նախագահ Ուրսուլա վոն դեր Լեյենը հայտնել է, որ նոր տեսակի կորոնավիրուսի համավարակի ֆոնին ստեղծված ճգնաժամանյին իրավիճակում Եվրամիությունը պատրաստվում է 100 մլրդ եվրո ծախսել ԵՄ տարածքում գործող ընկերությունների աշխատողների՝ չվճարվող արձակուրդ գնալը կամ ժամանակավոր անգործությունը կանխելու նպատակով:

Ինչպես գրում է The Guardian-ը, Եվրահանձնաժողովի նախագահը վստահություն է հայտնել առ այն, որ ԵՄ բոլոր 27 անդամ պետությունները կաջակցեն իր ծրագրին:

ԵՄ գործադիր ճյուղն այժմ առաջարկում է միջագային շուկաներից գումար վերցնել և որպես վարկ տրամադրել անդամ պետությունների կառավարություններին՝ նրանց հնարավորություն տալով ֆինանսավորել կարճաժամկետ աշխատանքային սխեմաներ, որոնց շրջանակում աշխատողներն աշխատում են կրճատված ժամերով, իսկ նրանց աշխատավարձի մի մասը վճարվում է պետության կողմից:

Վոն դեր Լեյենն ընդգծել է, որ նման սխեմաները եվրոպական որոշ երկրների հնարավորություն են տվել վերականգնվել 2008թ. ֆինանսական ճգնաժամից հետո:

«Դա կբավականացնի՞: Մենք խոսում ենք 100 մլրդ եվրոյի չափով վարկերի մասին: Դա ահռելի գումար է: Սա Եվրոպական միության համար շատ մեծ օգնություն է, որն առջևում է»,-ասել է պաշտոնյան:

Հայտնի է, որ Գերմանիան և Նիդեռլանդները դեմ են ծրագրին՝ հասկանալով, որ ԵՄ ավելի հարուստ երկրները ստիպված կլինեն ավելի շատ գումար վճարել:

Վոն դեր Լեյենը բացատրել է, որ ԵՄ երկրների ֆինանսների նախարարները ծրագիրը կուսումնասիրեն հաջորդ երեքշաբթի: Ծրագիրը կգործարկվի միայն այն դեպքում, երե բոլոր անդամ պետությունները միասին 25 մլրդ եվրոյի երաշխիք ապահովեն:

Նշվում է, որ երկրները կկարողանան Բրյուսելին վարկերի տրամադրման համար դիմել այն դեպքում, եթե նրանց տնտեսությունները չափից ավելի շատ են տուժել: