Ուկրաինայում ձերբակալվել է երկրի նախկին արտգործնախարարը

Ուկրաինայի նախկին արտգործնախարար Լեոնիդ Կոժարան ձերբակալվել է` իր իսկ տանը սպանություն կատարելու կասկածանքով: Այս մասին տեղեկացրել է Ուկրաինայի ներքին գործերի փոխնախարար Անտոն Գերաշչենկոն իր ֆեյսբուքյան էջում:

«Ուկրաինայի նախկին արտգործնախարար Լեոնիդ Կոժարան ձերբակալվել է ոստիկանության աշխատակիցների կողմից` իր սեփական տանը քաղաքացուն մտածված սպանելու կասկածանքով: Այժմ նրան տանում են դատարան` խափանման միջոցը որոշելու համար»,-գրել է Գերաշչենկոն:

Մեկ ամիս առաջ հաղորդվել էր, որ նախկին նախարարի տանը Կիևի 56-ամյա բնակիչ է մահացել: Պարզվել է, որ մահացածը ձեռնարկատեր, «Atlantic group» կազմակերպության գլխավոր տնօրեն Սերգեյ Ստարիցկին է եղել: Սկզբում ոստիկանությունը որպես մահվան գլխավոր վարկած էր ներկայացնում ինքնասպանությունը, ավելի ուշ պարզ է դարձել, որ դեպքը քննվում է որպես մտածված սպանություն:

Լեոնիդ Կոժարան Ուկրաինայի արտգործնախարար է եղել 2012-2014 թվականներին: