Գերմանիան կարող է մինչեւ 729 միլիարդ եվրո կորցնել

SARS-CoV-2 կորոնավիրուսի համավարակի հետ կապված՝ Գերմանիան կարող է 255-729 միլիարդ եվրո կորցնել, հաշվել է Տնտեսական հետազոտությունների մյունխենյան ifo ինստիտուտը։ Արտադրությունների դադարեցումը, աշխատակիցների հարկադիր անցումը ոչ լրիվ աշխատանքային օրվա եւ գործազրկության աճը էական ազդեցություն կունենան պետական բյուջեի վրա, իսկ ԳԴՀ տնտեսությունը կարող է կրճատվել 7,2-20,6 տոկոսային նիշով, հայտարարել է ifo-ի ղեկավար Կլեմենս Ֆյուստը, հայտնում է DW-ն։

Ընդ որում, այժմյան ճգնաժամից Գերմանիայի կորուստները, ամենայն հավանականությամբ, ավելի բարձր կլինեն, քան վերջին տասնամյակների տնտեսական ճգնաժամերի եւ բնական աղետների հետ կապված բոլոր վնասները, ասել է նա։Ֆյուստը նշել է ռազմավարությունների անհրաժեշտության մասին, որոնք թույլ կտան վերականգնել արտադրությունը՝ կորոնավիրուսի տարածումը զսպելու հետագա քայլերի ֆոնին։

Ifo-ի հաշվարկներով՝ տնտեսության մասնակի դադարման հետ կապված երկու ամսվա ծախսերը կկազմեն 255-495 մլրդ եվրո։ Ընդ որում, այդ սցենարի դեպքում Գերմանիայի տարեկան ՀՆԱ-ն 7,2-11,2 տոկոսով ցածր կլինի։

Արտադրության 3 ամսվա մասնակի դադարի դեպքում կորուստները կկազմեն 354-729 մլրդ եվրո, ինչը կհամապատասխանի տնտեսական աճի կրճատմանը 10,0-20,06 տոկոսով։

Միաժամանակ ifo-ի փորձագետները ենթադրում են, որ կորոնավիրուսի հետ կապված ճգնաժամը Գերմանիայում կարող է հանգեցնել մինչեւ 1,8 մլն աշխատատեղ կորցնելուն։ Բացի այդ, ավելի քան 6 մլն աշխատողների համար կարող կարճ աշխատաժամանակի գրաֆիկ սահմանվել։

Worldometer միջազգային կամավորական խմբի տվյալներով՝ կորոնավիրուսի համավարակը տարածվել է աշխարհի 192 երկրներում եւ տարածքներում, վարակվածների ընդհանուր թիվը անցել է 340 000-ից։ Հիվանդության հետեւանքով մահացել է մոտ 15 000 մարդ, առողջացել է ավելի քան 99 000 մարդ։ Գերմանիայում կորոնավիրուսը հաստատվել է մոտ 25 000 մարդու մոտ։