ԱՄՆ Պետդեպը Ռուսաստանին մեղադրել է էներգետիկայի ոլորտում թշնամական գործողությունների մեջ

ԱՄՆ Պետդեպարտամենտը չի մեկնաբանում Ռուսաստանի դեմ նավթի շուկայի իրավիճակի հետ կապված պատժամիջոցներ սահմանելու հնարավորությունը, սակայն պնդում է, որ Մոսկվան թշնամական գործողություններ է ձեռնարկում էներգետիկայի ոլորտում: Համապատասխան հայտարարությունը ճեպազրույցի ժամանակ արել է ԱՄՆ Պետդեպի բարձրաստիճան ներկայացուցիչը, հաղորդում է ՏԱՍՍ-ը:

«Մենք չենք խոսում պատժամիջոցների մասին: Մենք դա չենք մեկնաբանում: Սակայն մենք տեսնում ենք բազմաթիվ օրինակներ, երբ Ռուսաստանը թշնամական նպատակերի համար օգտագործում է էներգետիկան, եւ դրան այլեւս ոչինչ չեմ կարող հավելել»,- ասել է նա:

Նա հրաժարվել է հստակեցնել, թե արդյոք Պետդեպի ներկայացուցիչները բանակցություններ են վարել ռուսական կողմի հետ՝ կապված նավթի շուկայի իրավիճակի հետ: «Մենք բոլոր խաղացողներին կոչ ենք անում ուշադրություն դարձնել գլոբալ անորոշությանն ու տնտեսական դժվարություններին եւ համապատասխան գործողություններ ձեռնարկել դրանք հաղթահարելու համար»,- հավելել է ամերիկացի դիվանագետը:

Ավելի վաղ ԱՄՆ նախագահ Դոնալդ Թրամփը հայտարարել է, որ պատրաստվում է միանալ նավթի հարցով ՌԴ-ի եւ Սաուդյան Արաբիայի տարաձայնությունների շուրջ իրավիճակի քննարկմանը: Միեւնույն ժամանակ, ՌԴ նախագահ Վլադիմիր Պուտինի մամուլի քարտուղար Դմիտրի Պեսկովը հայտարարել է, որ Ռուսաստանը եւ Սաուդյան Արաբիան նավթի գների պատճառով պատերազմ չեն վարում: