Կորոնավիրուսի հետ կապված փսիխոզը մարդկանց ստիպել է ավելի կանոնավոր դառնալ. Լուկաշենկո

Կորոնավիրուսի հետ կապված փսիխոզը մարդկանց ստիպել է ավելի կանոնավոր դառնալ, ամենուր պահպանել տարրական միջոցառումները: Այսպիսի տեսակետ է հայտնել Բելառուսի նախագահ Ալեքսանդր Լուկաշենկոն այսօր «Ադանի» մասնավոր գիտաարտադրական ձեռնարկություն այցելության ժամանակ, փոխանցում է ԲԵԼՏԱ-ն:

Նրա խոսքով՝ «բարձրացել է կորոնավիրուսային աղմուկ եւ փսիխոզ», իսկ այդ ընթացքում կարեւոր է հիգիենայի տարրական միջոցառումներին հետեւելը՝ սկսած ձեռքերը լվանալուց:

«Վերջիվերջո, անհրաժեշտ է մարդկանց ստիպել պատասխանել իրենց եւ իրենց կողքին եղողների համար: Եթե դու քիթդ ես մաքրում, հազում ես, փողոց դուրս մի արի եւ մյուսներին մի թունավորի, վարակը մի տարածի: Սրա մեջ է ամբողջ էությունը: Եվ շատ պետություններ այս իմաստով անչափ խիստ միջոցառումներ են նախաձեռնում»,- ասել է Ալեքսանդր Լուկաշենկոն: Նա միաժամանակ շեշտել է, որ բելառուսցիներն այն վիճակում չեն, որ դաժան միջոցառումներ ընդունեն: Բայց նաեւ չի կարելի հանգստանալ: