Հռոմի Պապն աղոթել է համաճարակի ավարտի եւ բժիշկների համար

Կիրակի Հռոմի Պապ Ֆրանցիոսկոսը հեռացել է Վատիկանից եւ աղոթել հռոմեական եկեղեցիներում: Այդ մասին հայտնել է Վատիկանի մամուլի ծառայության ներկայացուցիչ Մատեո Բրունին, հաղորդում է ՏԱՍՍ-ը:

Ինչպես նա պարզաբանել է, հռոմեական եկեղեցում գտնվում է հրաշագործ խաչելությունը, որը 1522 թվականին դուրս էին բերել ծիսակարգի ժամանակ՝ աղոթելով ժանտախտի համաճարակի ավարտի համար: «Հռոմի Պապ Ֆրանցիսկոսն աղոթել է համաճարակի ավարտի համար, որը գրավել է Իտալիան եւ ամբողջ աշխարհը, հիվանդների ապաքինման համար եւ հիշատակել զոհերին՝ աղոթելով նրանց հարազատների եւ բարեկամների համար: Հովվապետը նաեւ աղոթք է ասել ամբողջ բուժանձնակազմին ուղղված, որոնք այս օրերին իրենց աշխատանքով երաշխավորում են հասարակության կյանքն ու առողջությունը»,-հայտնել է Բրունին:

Նոր կորոնավիրուսի առաջին բռնկումն Իտալիայում ի հայտ էր եկել փետրվարի 21-ին: Ըստ վերջին տվյալների՝ երկրում կորոնավիրուսի եւ դրա կողմնակի ազդեցության հետեւանքով զոհվել է 1,8 հազար մարդ: Ներկայում հանրապետությունում վարակված է ավելի քան 20 հազար մարդ: Ամբողջ երկրի տարածքում գործում է կարանտին, արգելված է բնակչության տեղաշարժն առանց լուրջ պատճառների, փակ են բոլոր ուսումնական հաստատությունները, խանութները (բացի մթերային խանութներից եւ դեղատներից), ռեստորաններն ու ակումբները, սպորտային եւ ժամանցային հաստատությունները, արգելված է զբոսաշրջիկների մուտքը:

Մարտի 11-ին Առողջապահության համաշխարհային կազմակերպությունը (ԱՀԿ) ճանաչել էր կորոնավիրուսի տարածումը որպես համաճարակ, որով վարակվել են ավելի քան 120 երկրներում: