Ռուսաստանում կորոնավիրուսով վարակման 14 նոր դեպք է հայտնաբերվել. վարակակիրների ընդհանուր թիվը հասել է 59-ի

Ռուսաստանում նոր տեսակի կորոնավիրուսով վարակվածների թիվն ավելացել է 14-ով: Ինչպես փոխանցում է РИА Новости-ն՝ վկայակոչելով հիվանդության դեմ պայքարի օպերատիվ շտաբի տվյալները, 9 նոր դեպք է արձանագրվել Մոսկվայում, մեկը՝ Մերձմոսկվայում, մեկը՝ Սանկտ Պետերբուրգում, երկուսը՝ Կեմերովոյի մարզում, ևս մեկը՝ Կալինինգրադի մարզում:

Նշվում է, որ բոլոր հիվանդները վերջին երկու շաբաթում այցելել են այնպիսի երկրներ, որտեղ կորոնավիրուսի համաճարակի հետ կապված իրավիճակն անբարենպաստ է: Վարակվածների հետ շփում ունեցած անձանց ևս հսկողության տակ են պահում:

ՌԴ-ում վարակակիրների ընդհանուր թիվը հասել է 59-ի, որոնցից 56-ը ՌԴ քաղաքացիներ են, երկուսը՝ Չինաստանի, մեկը՝ Իտալիայի:

Նոր տեսակի Covid-19 կորոնավիրուսի տարածման մասին Չինաստանի իշխանությունները հայտնել էին դեկտեմբերի 31-ին: Մարտի 11-ին Առողջապահության համաշխարհային կազմակերպությունը կորոնավիրուսի համավարակ է հայտարարել: Ըստ Ջոն Հոփքինսի համալսարանի գիտական կենտրոնի տվյալների՝ այժմ այն արդեն տարածվել է 146 երկրում: Ողջ աշխարհում վարակակիր է 149 293 մարդ, մահացել է 5609-ը, ապաքինվել՝ 72 042-ը: