Վաշինգտոնի նահանգապետը հայտարարել է կորոնավիրուսի համաճարակի սպառնալիքի մասին

Վաշինգտոնի նահանգապետ Ջեյ Ինսլին հնարավոր է համարում կորոնավիրուսով վարակման դեպքերի աճը կանխելու համար պարտադիր միջոցառումների կատարման սահմանումը: Ինսլիի խոսքով` եթե «իրական գործողություններ» չիրականացվեն, 8 շաբաթվա ընթացքում նահանգում վարակվածների թիվը կարող է աճել մինչեւ 64 հազար, հայտնում է «Ամերիկայի ձայնը»:

Ինսլիի խոսքով` համաճարակաբանները նախազգուշացնում են, որ այժմ Վաշինգտոն նահանգում, որը գտնվում է ԱՄՆ-ի հյուսիս-արեւմուտքում, կորոնավիրուսով իրականում վարակվել է 500-ից 2000 մարդ (ըստ պաշտոնական տվյալների, վարակվել է 267 մարդ), եւ, հաշվի առնելով շնչառական համակարգի սուր վարակի տարածման արագությունը, այս թիվը կարող է կրկնապատկվել ամեն 5-8 օրվա ընթացքում:

Սիեթլի նահանգի Քինգ շրջանի իշխանությունները երեքշաբթի հայտնել են վարակման եւս 74 եւ երկու մահվան ելքով դեպքի մասին: Ընդհանուր առմամբ, Ննահանգում կորոնավիրուսից արդեն 24 մարդ է մահացել: Փորձագետները կարծում են, որ իրականում այդ թվերն ավելի շատ են: «Լինի դա այսօր 500, կամ 1500, կամ 2000` դա շատ շուտով մեծ թվերի կհասնի»,- ասել է Ինսլին:

Պատասխանելով հարցին` դիտարկում է նա, արդյոք, դպրոցների փակումն ամբողջ նահանգում, թե` միայն վարակի բռնկման վայրերում, Ինսլին հայտարարել է, որ սպասում է, որ «տեղեկությունն այդ մասին կհայտնվի շատ շուտով»: «Ցանկացած հասարակական ակտիվության դադարեցումը լուրջ հետեւանքներ է ունենալու մարդկանց կյանքի համար: Պետք է տեսնել` կան արդյոք [հետևանքները] նվազեցնելու կամ մեղմելու ձեւեր»,- ասել է նահանգապետը:

«Եթե այսօր 1000 վարակված մարդ կա, ապա 7-8 շաբաթ հետո Վաշինգտոն նահանգում 64 հազար մարդ կարող է վարակվել, եթե մենք որեւէ կերպ չդանդաղեցնենք այդ համաճարակը: Եվ եւս մեկ շաբաթվա ընթացքում կարող է 120 հազար մարդ վարակվել, իսկ հաջորդ եռամսյակում` մեկ միլիոն»,- շեշտել է նահանգապետը: