Գերմանիան մեծացրել է սպառազինությունների արտահանումը Թուրքիա

2019թ․ Գերմանիայի կառավարությունը հաստատել է Թուրքիա սպառազինություններ արտահանելու 187 հայտ՝ 31,6 մլն եվրո ընդհանուր գումարով։ Այս ցուցանիշն ավելի քան երկու անգամ բարձր է, քան մեկ տարի առաջ, հայտնել է dpa-ն՝ հղում կատարելով բունդեսթագում Ձախ կուսակցության հարցմանը ԳԴՀ ԱԳՆ պատասխանին։

Ընդ որում, ռազմական զենքը Անկարային անցյալ տարի չէր մատակարարվել։ Սիրիայի հյուսիսում Թուրքիայի աշնանային ռազմական գործողության մեկնարկից հետո հաստատված մատակարարումների թիվը զգալիորեն կրճատվել էր, սակայն Բեռլինն ամբողջովին չի հրաժարվել դրանցից, նշվում է այնտեղ։ Հոկտեմբերի 9-ից հետո ԳԴՀ կառավարությունը հաստատել է 3,1 մլն եվրո ընդհանուր գումարով հինգ այդպիսի հայտ։ 2018թ․ գերմանական իշխանությունները հավանության էին արժանացրել Անկարային 12,9 մլն եվրո արժողությամբ սպառազինությունների 58 մատակարարումները, հայտնում է DW-ն։

Ձախ կուսակցության փորձագետ Սեւիմ Դագդելանը գերմանական սպառազինությունների մատակարարումը Թուրքիային անպատասխանատու է անվանել՝ կապված սիրիական հակամարտությանը նրա միջամտության հետ։