Ռուսների մեծ մասը դեմ է կին նախագահին կամ վարչապետին

Ռուսների մեծամասնությունը չի ցանկանում կին տեսնել ՌԴ նախագահ պաշտոնում` համարելով, որ կնոջն ավելի հարմար կլինի սոցիալական ոլորտներից մեկի գերատեսչության ղեկավարի պաշտոնը, հայտնում է «Ինտերֆաքս»-ը՝ վկայակոչելով հասարակական կարծիքի ուսումնասիրման համառուսաստանյան կենտրոնի հարցման արդյունքները:

Կին նախագահին դեմ է արտահայտվել հարցվածների 68 տոկոսը, 21 տոկոսը կողմ է արտահայտվել: 56 տոկոսը դեմ է արտահայտվել կին վարչապետին, 31 տոկոսը կողմ է եղել: Հարցվածների 83 տոկոսը չի ցանկացել կին տեսնել ուժային գերատեսչության ղեկավարի պաշտոնում:

Յուրաքանչյուր երկրորդի կարծիքով` կնոջը համապատասխանում է ղեկավարել քաղաքական կուսակցություն, դումայի խմբակցությունները կամ հանձնաժողովները: 69 տոկոսը կնոջը կտային առողջապահության, կրթության կամ սոցիալական ապահովության նախարարի պաշտոնը:

Կենտրոնի սոցիոլոգները նշել են, որ երիտասարդ քաղաքացիներն ավելի շատ են աջակցություն հայտնել կանանց քաղաքական ամբիցիաներին: Նախագահի պաշտոնում կնոջ գաղափարը սատարել է հարցման մասնակիցների 53 տոկոսը` 18-24 տարեկան տարիքային խմբից, վարչապետի պաշտոնում՝ 50 տոկոսը: Ընդ որում, 60 տարեկանից բարձր մարդկանց շրջանում հարցվածների 78 տոկոսը նախագահությունը տղամարդու մասնագիտություն է համարել, 66 տոկոսն այդպիսին է համարել նաեւ վարչապետի պաշտոնը: