«Դա հանցագործություն է ընդդեմ մահմեդական աշխարհի». Կադիրովը մեկնաբանել է Թրամփի առաջարկած «դարի գործարքը»

 Չեչնիայի ղեկավար Ռամզան Կադիրովն ԱՄՆ նախագահ Դոնալդ Թրամփի՝ իսրայելա-պաղեստինյան հակամարտության կարգավորման «դարի գործարք» անվանումը ստացած ծրագիրը համարում է «հանցագործություն մահմեդական աշխարհի դեմ»: Այս մասին տեղեկացնում է РИА Новости գործակալությունը:

Մարտի 2-ին Կադիրովը հանդիպել է Պաղեստինի նախագահի խորհրդական, գերագույն դատավոր Մահմուդ Ալ Հաբաշի հետ, որը գլխավորում էր Չեչնիա այցելած պաղեստինյան պաշտոնական պատվիրակությունը: Չեչնիայի ղեկավարի և կառավարության մամուլի ծառայությունը տեղեկացրել է, որ կողմերը քննարկել են Պաղեստինի և Չեչնիայի Ինքնավար Հանրապետության միջև տնտեսական, մշակութային և հոգևոր կապերի զարգացումը:

«Հանդիպման ընթացքում դատապարտեցի այսպես կոչված «Դարի գործարքը», որը կոպտորեն խախտում է միջազգային իրավունքի նորմերը և հանդիսանում է հանցագործություն մահմեդական աշխարհի դեմ»,-հայտարարել է Կադիրովը:

Չեչնիայի ղեկավարը նշել է նաև, որ համակարծիք է Պաղեստինի ներկայացուցչի հետ, որը նշել է, որ «հակամարտությունները մահմեդական երկրներում թեժանում և աճում են արևմտյան երկրների մասնակցությամբ, իսկ առանձին մահմեդական երկրների ժողովուրդների և ղեկավարների ոչ միասնական լինելը պարարտ հող է ստեղծում Մերձավոր Արևելքում իրավիճակի սրման համար»:

Հունվարի 28-ին ԱՄՆ նախագահ Դոնալդ Թրամփը հրապարակել է Իսրայելի և Պաղեստինի նոր սահմանների քարտեզը՝ ըստ իր առաջարկած «դարի գործարքի»: Հրապարակված քարտեզով՝ Պաղեստինը, ենթադրաբար, երկու մայրուղիներով կմիանա Հորդանանի սահմանային անցումներին: Պաղեստինյան Արևմտյան ափը Հորդանանից կբաժանվի իսրայելական տարածքի գծով: Ըստ Թրամփի առաջարկած քարտեզի՝ սիրիական Գոլանի բարձունքներն Իսրայելի տարածք են հանդիսանում: