Ամերիկացիների մեծամասնությունը համարում է, որ Facebook-ն ունի «չափազանց մեծ իշխանություն»

Ամերիկացիների ճնշող մեծամասնությունը համարում է, որ Facebook-ն ունի «չափազանց մեծ իշխանություն», սակայն, այդուհանդերձ, շատերը կհիասթափվեն, եթե սոցցանցը վերանա:

The Verge-ի «Տեխնիկական վստահության հարցումը» պարզել է, որ հարցվածների 72 տոկոսը համարում է, որ Facebook-ի ազդեցությունը շատ լայն է:

1123 հարցվածների շուրջ կեսը մտահոգություն է հայտնել այն հարցում, թե ինչպես է Facebook-ը մշակում օգտատերերի անձնական տվյալները: Սակայն 55 տոկոսը նշել է, որ կհիասթափվի, եթե սոցցանցն անհետանա:

10-ից գրեթե 9-ը հայտարարել է, որ ունի «դրական» կարծիք այնպիսի ընկերությունների մասին, ինչպիսին են Google-ը, Netflix-ն ու Microsoft-ը: Apple-ի համար այդ ցուցանիշը կազմել է 80 տոկոս, Facebook-ի համար՝ 71, իսկ Twitter-ի դեպքում՝ 61 տոկոս:

Մեծամասնությունն ասել է, որ Google-ը, Amazon-ը, Microsoft-ն ու Apple-ը «դրական» ազդեցություն են թողել հասարակության վրա, սակայն միայն 40 տոկոսն է գտնում, որ Facebook-ն այդ շարքին է պատկանում:

Հարցման արդյունքում 56 տոկոսը հայտարարել է, որ կառավարությունը պետք է բաժանի տեխնոլոգիական ընկերությունները, եթե դրանք վերահսկում են տնտեսության չափազանց մեծ մասը: Սակայն շուրջ կեսը չգիտեր, որ Google-ը YouTube-ի սեփականատերն է, իսկ Facebook-ը վերահսկում է Instagram-ն ու WhatsApp-ը:

Microsoft-ն առաջատարն է ամերիկացիների թվով, որոնք վստահում են ընկերությանը՝ 75 տոկոս, իսկ Amazon-ին վստահում է 73 տոկոսը: